Pisassiissutit Niuerutigineqarsinnaasut Nammineerluni Pigisat iluaqutaallutillu akornutaasut

Aqutsiveqarfik 47-mi Qeqertarsuup Tunuani, Uummannami Upernavimmilu sinerissap qanittuani qaleralinniarluni aalisarnermi Pisassiissutit Niuerutigineqarsinnaasut Nammineerluni Pigisat, PNNP-nik taaneqartartut, ukioq manna januarip aallaqqaataaniik maannakkumut qassit tunineqarsimanersut imaluunniit nuunneqarsimanersut pillugu Inatsisartunut ilaasortaq aamma Avannaata Kommuniani 1. viceborgmesteriusoq Jens Napãtôᴋ', Naleraq, lnatsisartut suleriaasianni paragraf 37 naapertorlugu Naalakkersuisunut apeqquteqarpoq.

PNNP-nillu niueruteqartarneq atugaalluartoq Aalisarnermut, Piniarnermut, Nunalerinermut Imminullu Pilersornermut Naalakkersuisup Peter Borgip, Demokraatit, akissutaani erserpoq.

Aalisarnermut inatsisip ukioq manna atuutilersinneqarneranut atatillugu umiatsiaararsortut pisassiissutinik niuerutigineqarsinnaasunik nammineerluni pigisanik pisassinneqarsinnaalernerat arlalitsigut pitsanngorsarneqarsinnaagaluartoq, taamaattoq aamma iluaqutitaqartoq umiatsiaararsortut oqaatigaat. Akerlianilli ingerlatseqatigiiffinnut mikisunut nunap qaani aalisakkanut suliffissuaatilinnut annertuumik eqquinerluttoq Rodebay Fish ApS-ip Oqaatsuni aalisakkanut suliffissuaataani pisortaq Knud Fleischer oqarpoq.

Atorluarneqartoq

Umiatsiaararsortut 6 meteri tikillugu angitigisunik angallatillit aamma angallatit 6 meteriniik anginerisut, kiisalu ingerlatseqatigiiffiit aalisakkanut suliffissuaatillit akornanni piffissami januarip aallaqqaataaniit 12. septemberip tungaanut 49-riarluni katillugit 679 tonsinik PNNP-nik tunisisoqarlunilu pisisoqarsimasoq, Aalisarnermut Naalakkersuisoq Jens Napãtôᴋ'-mut akissuteqarluni allappoq.

Januarip aallaqqaataaniit inuit ingerlatseqatigiiffiilluunniit arfinillit pigisaminnik tamakkiisunik tunisisoqarsimapput, taamaalillutillu aalisarnermiit anisimallutik. Aalisarnermut Naalakkersuisup paasissutissiinera naapertorlugu aalisartut pisassiissutiminnik tamakkiisumik tunisisut ilaat soraarninngorsimapput, aqutsiveqarfimmit 47-mit nuussimallutik imaluunniit peqqiilliorpallaalersimanertik peqqutigalugu aalisarunnaarsimallutik.

Sinnerisa pisassiissutinit nammineq pigisami ilaannaat tunisimavaat. Pisassiissutinit nammineq pigisanit imaluunniit pisassiissutit ilaanniit tunisinermi pisinermiluunniit tunisat qanoq akeqarneri pillugit paasissutissanik Aalisarnermut, Piniarnermut, Nunalerinermut lmminullu Pilersornermut Naalakkersuisoqarfik tigusineq ajortoq ilanngullugu paasissutissiissutigineqarpoq.

Pitsanngorsagassaqartoq pitsaasuusorli 

Ilulissani umiatsiaararsortoq Anders Sandgreen Reimer ukioq manna PNNP atorlugu aaqqissuussamut nuuppoq, taannalu pisassami qaavisigut Ilimanami Rodebay Fish ApS-imiit qaleralittassiissutinik 15 tonsinik pisivoq. PNNP atorlugu umiatsiaararsortunut agguaasseriaaseq arlalitsigut pitsanngorsarneqarsinnaagaluartoq, taamaattoq qaleralittassiissutinik pisillunilu tuniniaasinnaanermut periarfissaq umiatsiaararsortunut pitsaasuusoq, taanna isumaqarpoq.

- Umiatsiaararsortunut PNNP-nik pisasseeriaaseq siullermik paasissutissiissutigineqartuniit allaanerusoq paasinarsivoq, taamaattumik umiatsiaararsortut PNNP atorlugu aaqqissuussamut nuuttut amerlasuut naatsorsuutigisamit ikinnerusunik pisassinneqarnikuupput.

- Paggatassiissutinik aalisarninnut naleqqiullugu PNNP atorlugu pisassakka ikinnerujussuupput, taamaattumik pisassiissutinik pisisariaqarsimavunga.

- Rodebay Fishimut pisassiissutinik pisiniarnera paaseqatigiiffiusumik pitsaasumillu ingerlasimavoq, periarfissarlu taanna pitsaasuusoq isumaqarpunga, taanna oqarpoq.

PNNP atorlugu aaqqissuussamut nuunneq nutaajullunilu unammillernartoqalaaraluartoq, tamanna peqqissimassutiginagu, taassuma erseqqissaatigaa.

- Pisassanik nalilinnik pigisaqarneq toqqissimanarpoq, taakkulu nammineq pisariaqartitsineq naapertorlugu pisinikkut ilaneqarsinnaapput, Anders Sandgreen Reimer oqarpoq.

Umiatsiaararsortut PNNP-nik pigisaqartut akornanni pisassiissutinik tuniniaasarneq pisisarnerlu atorluarneqartoq, taassuma oqaatigaa.

Eqquinerluttoq 

PNNP-mik aaqqissuussap umiatsiaararsortunut atuutilersinneqarnera Oqaatsuni Rodebay Fish ApS-ip aalisakkanut suliffissuaataani qalerallit tunisassiat malunnaatilimmik ikileriarnerannik kinguneqartoq, aalisakkeriviup pisortaa Knud Fleischer oqarpoq.

- Ukiup aallartinnerani qaammatini siullerni umiatsiaararsortut tunisaat amerlapput. Kisianni piffissami kingullermi PNNP atorlugu aalisartut tunisisartut ikittuinnanngorsimapput, tamannalu pisassaatiminnik ukiup sinneranut sipaartariaqalernerannik peqquteqarsorinarpoq.

- Aasap ingerlanerani tulaassisartut ullormut 30-t sinneqartarput maannakkulli ullormut tallimat missaannaat tunisisarput.

- Pissutsit taamatut ingerlaannassappata aalisakkanut suliffissuit mikisut ukiuni tulliuttuni imminut akilersinnaasumik ingerlaannarsinnaanissaat innarlerneqassaaq, taanna oqarpoq.

Rodebay Fish ApS katillugit aqqanilinnik sulisoqarpoq, taakkuli aasap ingerlanerani tamakkiisumik sulisaraluartut maannakkut ullup affaannaanut sulisalertut, aalisakkanut suliffissuup pisortaata oqaatigaa,

Rodebay Fish ApS qaleralittassiissutinik pigisaqarpoq, tunisassiornerullu ataavartumik ingerlaannarsinnaanissaa ilaatigut qulakkeerniarlugu ingerlatseqatigiiffik pisassiissutinik aalisartunut tunisaqartarpoq.