Pisiffik iluanaarutitigut tatineqartoq

Pisiniarfeqarfiup nerisassanillu sullissiveqarfiup Kalaallit Nunaanni anginersaasup Pisiffiup siorna sinneqartoorutai, taamaalillunilu iluanaarutai, ikileriarujussuarput.

Pisiffiup kaaviiaartitai 1,415 milliardit koruuninut 2023-mi qaffapput. Tamanna 2022-mut naleqqiullugu 2,8 procentinik qaffariaataavoq. Akileraareernermi angusat 18,5 millioniupput, tamannalu ukiup siulianut naleqqiullugu 51 procentimik appariaataavoq.

Iluanaarutit ikinnerugaluartut ataatsimut angusat naammaginartut siuttut isumaqartut, 2023-mut naatsorsuutit inerneranni atuarneqarsinnaavoq.

- Iluanaarutit appariarnerat arlalinnik pissuteqarpoq, ilaatigut amerlanernik aningaasartuuteqarneq aningaasaliinerillu pissutaallutik. 50 millionit koruunit angungajallugit 2023-p ingerlanerani aningaasaliissutigineqarput.

- Ilaatigut nerisassanik pisiniarfinni maskiinanut puunik utertitsisarfinnut milliuuninik marlunnik kisitsisilinnik ukiup affaata aappaani aningaasaliisoqarpoq. Imeruersaatit puui pillugit nalunaarut 2024-mi januaarip aallaqqaataani atuutilersoq aningaasaliinermut pissutaavoq, Pisiffiup pisortaanera Per Steen Larsen Sermitsiamut allakkatigut oqaaseqaateqarpoq. 

Akikillilerutit

Pisiffiup niuerfinnut naleqqussartuartariaqarnerani, pisiniartartut aningaasaatitik qanoq atortassanerlugit isumaliuutiginerusalersimavaat.

- Pisiniartartut aningaasat namminneq atorsinnaasaat ikinnerusutut nalilerneqarpoq, nioqqutissallu akikinnerit, ilisarnaaserlugu tuniniakkanit qinigassat allat akikinnerit neqeroorutillu soqutigineqarneruleriartortut malugineqarpoq.

- 2023-mi 200 milliuunit koruuninut akikillititsivugut, taakkulu oqaluttuarisaanitsinni amerlanersaapput. Pisiniartartut aningaasat atorsinnaasaat ikinnerummata, 2024-mi pissutsit siornatut ingerlaannarnissaat naatsorsuutigaarput, pisortaq oqarpoq.

Tamaanimiunik sulisussarsiorneq unammillernarnerusunut ilaavoq.

- Unammillernartoq una uagut suliffeqarfitsinniinnaanngitsoq atuuppoq, inuussutissarsiortunili arlalinni atuunneruleriartorluni. Sulisulli pikkorinnersaat piginnaasaqarnerpaallu sulisorilernissaannut sulisoriinnarnissaannullu pimoorussilluta sulissuteqarpugut, Per Steen Larsen oqarpoq.

NIttartakkatigut pisiniarfik alliartortoq

Nittartakkatigut pisiniarfinnik nunanit allaneersunik unammillerteqaraluarluni Pisiffiup nittartakkatigut pisiniarfia malunnartumik alliartorpoq.

- Kalaallit Nunaanni tamani pisiniartartut atorfissaqartitaat pigiumallugit pisiassaatigut amerlisittuarpagut, siuttoq oqarpoq.

Pisiffiup piujuartitsinermut pimoorussinini 2024-mi nanginniarpaa. Tamanna ingammik nerisassanut, avatangiisinut inunnullu tunngatillugu qitiusutut ukkappaa.

- Sulisutsinnut inuusuttunut ilitsersuisunik ilinniartitsinermik aallartitsivugut. Tamanna Kalaallit Nunaanni UNICEF suleqatigalugu pivoq. Sulisunut inuusuttunut 100-nut ilitsersuisut 20-25-t ilinniartinnissaat anguniagaavoq, Per Steen Larsen oqaluttuarpoq.

Pisiffiup nerisassanik maangaannartitsinermik millisaanermik suliniuteqarnini annertusiniarpaa, inerititanillu taavalu naatitanik tuniniaanerunikkut peqqinnarnerusunik nerisarnissamut siuarsaanermik ukkataqarniarluni.

Pisiffiup pisiniarfeqarfimmini nerisassanillu sullissiveqarfimmini 2024-mi kaaviiaartitaqarnerunissani akileraareernermilu sinneqartooruteqarnerunissani naatsorsuutigaa.