Pisiffimmi sulisut 22-t tapersersortitut ilinniartut

Pisiffimmi sulisut inuusuttut maanna tapersersorteqarsinnaalerput. Pisiffiup sulisuni 22-t tapersersortitut ilinniartereermagit tamanna periarfissanngorpoq.

Pisiffiup sulisumi inuusuttut toqqissisimanissaat isumannaatsuunissaallu qulakkeerniarpaa. Sulisut 22-t maanna tapersersuisutut ilinniartinneqarsimalerpoq Pisiffimmilu inuusuttunik sulisunik siunnersuisartussanngorlutik.

Pisiffimmi sulisut 22-t siulliit maanna suliffeqarfimmi inuusuttunut tapersersortitut imminnut taasinnaanngorput. Sulisut tapersersortinngornissamut ilinniarneq nutaaq naammasseqqammerpaat, taamaalillutillu Pisiffimmi inuusuttunut tapersersuisinnaanngorlutik.

Taama UNICEF tusagassiutinut nalunaarummi allappoq.

- Pisiffimmi sulisutsinnut inuusuttunut tapersersortit siulliit ilinniarsimasunngorneri nuannaarutigalugulu tulluusimaarutigaara, Pisiffimmi pisortaaneq Per Steen Larsen oqarpoq.

- Pisiffimmi inuusuttut suliffeqarfitsinni ineriartorluarnissaannut ikiorniarpagut, ilinniarnissaannut suliffeqaannarnissaannullu kajumissaarlugit – suliffimmi qaffakkiartornissamut tunngavilerniarlugit. Taamaammat tapersersuisoqarneq UNICEF peqatigalugu pilersipparput.

Suliniutit allat ilaasut

Tapersersortitut ilinniartinneqarnerat UNICEF suleqatigalugu ingerlanneqarpoq, taannalu Pisiffimmi meeqqat inuusuttullu pillugit isiginnittaatsimik, Naalagaaffiit Peqatigiit Meeqqap Pisinnaatitaaffii pillugit Isumaqatigiissutaanik tunngaveqartumik, ineriartortitseqataasumik.

- Pisiffiup – tapersersorteqartitsilernerup aammalu meeqqanut inuusuttunullu isiginnittariaaseqalernerminni inuusuttut pisinnaatitaaffiinut siunissaannullu akisussaaffimmik tigusinerat nuannerpoq, UNICEF Kalaallit Nunaanni suliniutinut aqutsisoq Tina Dam oqarpoq.

Sulisorisat inuusuttut toqqissisimanissaat isumannaatsuunissaallu qulakkeerniarlugu suliniutinik arlalinnik pilersitsiumaarluni Pisiffik ilisimatitsivoq.

- Pingaartumik inuusuttut atugaat ineriartornerallu suliaqarfiginerini isumaqarpunga Kalaallit Nunaanni suliffeqarfinni pitsaanerpaanissatsinnik anguniagarput angusinnaagipput. Meeqqanut inuusuttunullu politikkitta pitsaanerulernissaanik ataavartumik suliaqarnitsinni pisussaaffigaarput suliffimmi avatangiiseq, sulisut ataasiakkaat atugarissaarnerulernissamut iluatsinnissamullu periarfissaqalersitsisoq pilersissallugu, Per Steen Larsen oqarpoq, nangipporlu:

- Isumaqarpunga suliffimmi avatangiisigissaarneq sulisut nalerisimassusaannut suliaqarluarsinnaanerannullu aalajangiisuusoq. Aqutsisugut pikkorissut, suliffeqarfillu inissaqartitsillunilu peqataatitsitsoq aqqutigalugit, piffik kikkunnut tamanut naleqartitsisoq ataqqinniffiusorlu anguniarparput, Per Steen Larsen oqarpoq.

Powered by Labrador CMS