Pisiffiup millionilikkaanik aningaasaliinissaq taamaatippaa
Pisiffik Nuuk Centerimi peqataajumajunnaarppoq, taarliullugulu pilersaarutaaqqaartumut allakkerivikumut uterluni.
Pisiffiup piginnittui, Dagrofa Dagrofa-llu siulersuisui 200 millioner kroneinut aningaasaliinikkut sanartornissaq unitsinnarpaat, pilersaarutaareersumut Nuuk Centerimut pingasunik niuertarfissualiornissamut atugassaagaluit, Pisiffiup pisortaa Carsten Lynghøj ilisimatitsivoq.
Taamatut aalajangernermut tunngaviuvoq, Dagrofa isumaqarami Nuup qeqqani niuertarfissuarmut aammalu nerisassaarniarfiunngitsunut pisiniarfissuarnut aningaasaliinissamut aningaasaqarnikkut tunngavissaqanngitsoq.
- Pisiffiup allakkerivitoqaq pigereerpaa, tassani supermarked-imi pilersitsinissaq pilersaarutaaqqaaraluarpoq, kisianni massakkut inissisimaffimmut pilersaarutaaqqaartumut utissaagut, taamalu soqutigisaqaqatigiit allat Nuup Kommunialu suleqatigalugit ulluinnarni pinngitsoorneqarsinnaanngitsunik nioqqutissaqarfiusumik niuertarfiliornissamut periarfissiuussiniarpugut, nunaminertamilu tassani illorsuarmik takujuminartumik atorluarsinnaasumillu pilersitsiniarluta, Carsten Lynghøj erseqqissaavoq.
Peqatigitillugu pisiniarfiit Jysk aamma Pisattat inissamik anginerusumik pisariaqartitsipput. - Tamannalu pilersitseriarsinnaassuserput atorlugu aaqqinniartariaqarparput, pisortaq oqarpoq.