Pisiffiup, Pilersuisup Brugsenillu naatitanik tunisassiornerujumapput

Paarisa, Pilersuisoq, Brugseni Pisiffiullu akornganni suleqatigiinnermi nioqqutissanik peqqinnartunik tuniniaanermik siuarsaanissartik anguniagaraat, Kattulluta Inuuneritta-Sammen om det gode liv-imi ukiumoortumik nalunaarusiami takuneqarsinnaavoq, naatitat grøntsagillu 2023-mi nioqqutissani tunineqarnerpaat sisamaattut qulingiluatullu inissisimasut.

Suleqatigiit 2023-mi naatitanik tunisinerup inernera naammagisimaarluarpaat, isumaqarpulli pitsaanerusumik tuniniaasoqarsinnaasoq.

- Suleqatigiinnitsinni anguniagaraarput pisisartut pisiarisartagaannik paasissutissanik katersineq. Taamaalilluta pisisartut qanoq pisisarnersut takusinnaavagut pisiniarfinnilu nioqqutissat assigiinngitsut neqeroorutiginerisigut, iliuuseqarfiginerisigut pisiniartartullu pisiniarfinni neqeroorutigisinnaasatsinnik peqqinnarnerusunik soqutiginnilersinniarlugit, Kasper Dyrberg, Brugsenimi attaveqaqatigiinnermut sulisoq oqarpoq.

Naatitat grøntsagillu tunineqarnerulernissaat

Brugsenimi digitalikkut nittarsaassinikkut naatitanik tuniniaanermik siuarsaaniarsarisarput.

- Digitalikkut nittarsaassineq ukkatarilluinnarparput, digitalikkullu neqeroorutigut soqutiginarsarniartarpagut, nerisassanut najoqqutassianik isumassarsiatinillu ilallugit, taamaalillutik pisiniartartugut peqqinnarnerusumik toqqaasinnaaniassammata. Naatitat grøntsagillu qerisut naatitat grønsagillu nutaat inuussutissartaat assigiipput. Taamaattumik pingaaruteqarpoq eqqaamassallugu naatitanik grøntsaginillu nutaarluinnarnik pisiniarfinni pisiassaqanngippat, naatitat grøntsagillu qerisut atorneqarluarsinnaammata, Kasper Dyrberg Brugsenimi attaveqaqatigiinnermut sulisoq oqaatigaa.

Pisiffimmi aamma KNI A/S Pilersuisumi naatitat grøntsagillu ukiuni kingullerni tunineqarnerulersimapput. Pisiffik periusissiamik 2025-p tungaanut atuuttussamik ineriartortitsisimavoq. Periusissiaq Pisiffiup ataatsimut isigalugu piujuartitsinermik suliniutaasa qitiutinneqarput, naatitat grøntsagillu naleqartitaasa ilarujussuat pineqarput. Pisiffimmi naatitat grøntsagillu tunisat 2023-mi ukiup siulianut sanilliullugit marloriaammik amerlanerupput.

- Pisiffiup naatitanik grøntsaginillu tunisinermi 2022-miit 2023-mut 6 tonsinit 14 tonsinut amerlisimammat nuannaarutigaarput tulluusimaarutigalugulu, Pisiffimmi nittarsaassinermut, attaveqaqatigiinnermut CSR-imullu pisortaq Tina Hansen oqaatigaa.

Naatitanik assartuineq

Naatitat grøntsagillu amerlanersaat nunanit allanit assartorneqartarput, taakkulu sunnertiammata sivikitsumillu atorneqarsinnaammata nutaajutinnissaat unamminiarnarsinnaavoq. Pisiffik, ilaatigut Islandimi suleqateqartartoq, naatitat grøntsagillu nutaajunerani tuniniarusuttarpaat.

- Islandimiit pilersuisunik suleqateqarneq pitsaasoq, assartuinerup sivikinnerujartornera pissutigalugu, aammalu nunaqavissunik pilersuisunik suleqateqarnissaq aalajangiusimavarput, Pisiffillu aamma tamatumani siumukarluarpoq, Pisiffimmi nittarsaassinermut, attaveqaqatigiinnermut aamma CSR-imut pisortaq Tina Hansenip oqaatigaa.

Ilaannikkut naatitat nutaajuallaaratik nunatsinnut tikittartut, KNI A/S Pilersuisoq-mimmi tamanna ajornakusoortinneqartarpoq.

-Tamanna KNI-miit iliuuseqarfigiuminaappoq, tamanna silap pissusaanik pissuteqartumik aallaaveqakkajuttarmat. Taamaattoqartillugu ilaatigut nerisassanik asiutitsineq pinaveersaarniarlugu akit apparneqartarput, aamma naatitat grøntsagillu pineqartillugit, Paneeraq Olsen KNI A/S-imi ESG-mik aamma HRD-imik aqutsisup oqaatigaa

Siunissamut anguniakkat

Pisiffiup naatitanik neqeroorutigisartakkaminik amerlanerusunik neqerooruteqarnini ingerlatiinnarusuppaat, aammali naatitanik tuniniaanermigut tunisaqarneruniarlutik.

- Anguniagarput tassaavoq ukiumut naatitat grøntsagillu 5 procentit sinnerlugit amerliartornissaat. Naatitat grøntsagillu tunineqarnerisa annertusinissaannut suliniutit piviusunngortinnissaat piviusunngortinnissaallu qilanaaraarput, taamaalilluni ukiumut nalunaarusiami normu 4-tut aamma 9-tut inissisimanerput neriuutissatsinnik pitsaanerusunik taarserneqarsinnaaniassammat, Pisiffimmi nittarsaassinermut, attaveqaqatigiinnermut aamma CSR-imut pisortaq Tina Hansenip oqaatigaa.