Pisiniarfiuteqarfik sinneqartooruteqalaarpoq – 21. mio. kr.-t pisisartunut utertinneqartut
Brugsenip ukiumoortumik naatsorsuutaani takuneqarsinnaavoq, 2022-mi 3,3 million koruuninik amigartooruteqaraluarluni 2023-mi akileraarutit suli ilanngaatiginagit 1,4 million koruuninik sinneqartooruteqarsimasoq.
- Nuannaarutigaarput ukioq manna saqqummiussinnaagatsigit naatsorsuutit angusaqarluarfiusimasut ilaasortarpassuatta sulisorpassuattalu iluaqutissaannut pilersissimasavut tamaasa eqqarsaatigalugit, Susanne Christensen, Kalaallit Nunaanni Brugsenimi pisortaq oqarpoq.
Foto: Brugseni
Kalaallit
Nunaanni Brugseni 2023-mi akileraarutit suli ilanngaatiginagit 1,4
million koruuninik sinneqartooruteqarpoq.
Taamaalilluni
pisiniarfiutileqatigiiffiup 2022-mi amigartooruteqalaarnera 2023-mi
sinneqartooruteqalaarneranik kinguneqarpoq.
Pisortap
Susanne Christensenip naatsorsuutit nuannaarutigai:
-
Nuannaarutigaarput ukioq manna saqqummiussinnaagatsigit naatsorsuutit
angusaqarluarfiusimasut ilaasortarpassuatta sulisorpassuattalu
iluaqutissaannut pilersissimasavut tamaasa eqqarsaatigalugit.
Sanaartornissamillu iluarsartuussinissamillu suliniuteqarnissamik
pilersaaruteqaratta allisaanissamut inerisaanissamullu
periarfissaqarluarpoq, pisortaq Susanne Christensen tusagassiuutinut
nallunaarummi oqaluttuarpoq
Ilaasortanut
21 mio. kr.-t
Aammattaaq
pisiniarfiuteqarfiup Brugsenip ilaasortaanut tamanut Divi Plussi
aqqutigalugu 21 millionit koruunit missaat utertissimavai:
-
Tulluusimaarutigaarput akit eqqarsaatigalugit
unammillersinnaassuseqarluaratta Divi Plussimilu kroninik 20,9
millioninik ilaasortatsinnut tunniusseqqissimagatta,
pisiniarfiutitsinni pisiniartarnerat qujamasuutigigatsigu, pisortaq
Susanne Christensen nangippoq.
Brugsenip
immikkoortortaqarfii arfineq-pingasuupput, taakkulu katillugit
17-inik pisiniarfiuteqarput, Nanortalimmiit avannamut Ilulissanut.
2023-mi
kaaviiaartitat procentimik ataatsimik qaffariarput 1.045 mio. kr.-nut
– 1 milliard koruunit sinnerlugit. Pisiniarfiit pingasut, Nuummi
Nuukullammi, Ilulissani Qaqortumilu siuariarsimasut, Brugsenip
ukiumoortumik naatsorsuutaani erseqqissarneqarpoq:
-
Qaqortumi tunisaqartoqarnerulersimavoq innuttaasunik
sullissilluarnerunikkut nioqqutissanillu
toqqagassaqarluartitsinikkut, ukiumoortumik nalunaarusiami
allaqqavoq.
Brugseni
2023-p naalernerani 585-inik sulisoqarpoq, taakkununngalu ilaapput
sulillattaartartut inuusuttuaqqallu.
Pappiararpassuarnik
sipaartut
Brugseni
aamma piujuaannartitsinissamut nalunaarusiorpoq, tassanilu ilaatigut
pisiniarfiuteqarfiup CO2-mik aniatitsinini annikillisimagaa
erseqqissarneqarpoq, ilaatigut aviisinit naqitanit digitalimik
pilerisaarinermut ikaarsaariarnikkut:
-
Digitaliusutiguttaaq pilerisaarinermut 100%-imik ikaarsaarnikkut
pappiaqqat tonserpassuit avatangiisinik ajoqusiinissaat
pinngitsoortinneqarpoq, Brugseni allappoq.
Brugsenip
aamma sulisut atugarissaarnerat sulissutigisimavaa, suliffeqarfillu
ilisimatitsivoq siorna kalaallit suliffeqarfiini siullersaalluni
”Danmarkimi suliffiit pitsaanerpaat” allattorsimaffiannut
ilanngunneqarsimalluni.
-
Allattorsimaffimmi tamatumani inissisimaniunnersuaqarmat
tulluusimaarutigeqaarput suli siuttunut ilaagatta, pisortaq Susanne
Christensen oqaluttuarpoq.