Pisortaaneq nutaaq periusissiarlu allanngortitaq
Greenland Minerals Kalaallit Nunaanni akuersissummiksuli peqartoq, Aatsitassanut Naalakkersuisoqarfimmitoqaatigineqarpoq.
Greenland Minerals sapaatip-akunnerani kingullermi børsikkut nalunaaruteqarpoq, tamannalu pissutigalugu tusagassiorfiit arlallit allapput, Australiamiut aatsitassarsioqatigiiffiata Kalaallit Nunaat qimaleraa. Børsimili nalunaarsugaq malillugu taamaattoqanngilaq.
Børsimi nalunaarsukkami allassimavoq ingerlatseqatigiiffik nutaamik pisortartaarsimasoq, kiisalu »Kalaallit Nunaanni inatsisitigut allaffissornikkullu allannguutit pissutigalugit suliniutit annertusarniarneqartut, aatsitassanik atortussiassanillu attuumassutilinnik ujaasinermi nutaanik periarfissarsiortoqarluni, taamaalilluni piginneqatigiissutit nalingat qaffassarniarlugu«.
Allatut oqaatigalugu piginneqataasut eqqissisarneqarput Kalaallit Nunaanni ingerlatat saniatigut, inatsisikkut piumasaqaatit allanngortinneqarnerisa kingunerisaanik sumiiffiit allat samminiarneqassasut.
Aningaasaliissutissat sammillugit
Taamaalilluni Australiamiu John Mair, ujarassiuutut ilinniagaqarsimasoq, Greenland Mineralsimi pisortaajunnaarpoq. Pisortaaninngorpoq Daniel Mamadou, taannalu Singaporemi aningaasanik ingerlatsivimmeersuuvoq. Ingerlatseqatigiiffik pigisani Welsbach Holding aqqutigalugu saffiugassanik atortussiassanillu, mingutsitsinngitsumut allanngortitsinissamut pisariaqartunik, ujaasinerit ineriartortitsinermillu suliniutit aningaasaliiffigisarsimavai.
Taanna 2021-mi aggustimi Canadamiut ingerlatseqatigiiffiata Medallion Resourcesip siulersuisuinut qinigaavoq, taassumalu akuiaaviliornissaq sulissutigaa, aasitassanik qaqutigoortunik immikkoortitsivik, pingaartumik atortussiassaq monazit aallaavigalugu, taannalu sananeqaatimigut Kuannersuarni streenstrupinmut assinguvoq aammalu thoriumimik akoqarluarluni.
Tassa pisortat nikinnerat isumaqanngilaq Greenland Mineralsip Kalaallit Nunaat qimanniaraa, immaqali periutsip allanngortinneqarnissaa pineqarnerusoq. Uranip inerteqqutaalernissaanik inatsisip nutaap politikkikkut akuersissutigineqarnerata kingunerisaanik suliap nanginneqarnissaa pillugu Aatsitassanut Naalakkersuisoqarfiup Greenland Minerals oqaloqatigisarpaa.
Oqaluttuaq tamaat Sermitsiami sapaatip-akunnerani matumani saqqummersumi atuaruk, ugguuna iserfigisinnaavat: