Inuussutissarsiornermi ilisimaneqartoq Janne
Moltke-Leth Kalaallit Nunaanni suliffeqarfiit annersaasa Royal Greenlandip
siulersuisuini ukioq ataasiinnaq ilaasortaareerluni ilaasortaajunnaarniarluni
aalajangerpoq.
Siulersuisuni ilaasortaajunnaarnera Royal
Greenlandip nittartakkani aqqutigalugu tusagassiutitigut nalunaarutigaa.
Inuussutissarsiornermi ilisimaneqartoq Janne
Moltke-Leth Kalaallit Nunaanni suliffeqarfiit annersaasa Royal Greenlandip
siulersuisuini ukioq ataasiinnaq ilaasortaareerluni ilaasortaajunnaarniarluni
aalajangerpoq.
Siulersuisuni ilaasortaajunnaarnera Royal
Greenlandip nittartakkani aqqutigalugu tusagassiutitigut nalunaarutigaa.
Janne Moltke-Leth qallunaat
akitsisorterivianni ilisimaneqartumi tusaamasaasumilu Bruun Rasmussenimi
pisortaanerullunilu Sydbankip siulersuisuini ilaasortaavoq.
Taanna Naalakkersuisunit, Royal Greenlandimik
piginnittuusunit, 2024-mi maajimi aalisakkerinermi suliffeqarfissuarmi
siulersuisuini ilaasortanngortinneqarpoq.
- Ukioq
allanngorarfioqisoq, aalajangigassanik annertuunik
aalajangiiffiusariaqarsimasoq, suliffeqarfimmilu annertuunik
allannguiffiusariaqarsimasoq, ilaatigut aqutsisutut atuuffillit Nuummi
ataatsimoortinneqarnissaannik pingaarnertullu niuerfinnik pingaarnertullu
tunisassianik pingaartitsiffiulluni ingerlatsisoqalerfiusoq, Royal Greenland 2024-mi
pisut pillugit allappoq.
Royal Greenland akileraarutit
ilanngaatigereerlugit 2023-mi 211 millionit koruuninik amigartooruteqarsimasoq
2024-mi 265 millionit koruuninik amigartooruteqarpoq.
Aqutsinermi unammillernartut
Royal Greenland aningaasaqarnikkuinnaanngitsoq
aammali aqutsinikkut unammillernartoqarsimavoq. Suliffeqarfissuup
ingerlatseqatigiiffimmi pisortaaneq Susanne Arfelt Rajamand ukioq manna
februaarimi tassanngaannartumik soraarsippaa.
Taamatuttaaq pisortaanerup tullia
tunisassiornermilu pisortaq Lars Nielsen ukioq manna soraarniarluni aalajangerpoq,
Nils Duus Kinnerupi aningaasaqarnermut pisortatut 2024-mi okmtobarimi soraartoq.
Maannalu Janne Moltke-Leth Royal Greenlandip
siulersuisuini ilaasortaajunnaarpoq.
- Royal
Greenlandip siulersuisuini ilaasortaasimanera assorsuaq nuannerpoq assullu
ataqqinaataalluni. Suliffeqarfiup ilorraap tungaanut ingerlalernera
qularutiginngilara, taamaattumillu toqqissisimallunga tunuarpunga, Janne
Moltke-Leth tusagassiutitigut nalunaarummi oqarpoq.
Siulersuisuni siulittaasumit Maliina
Abelsenimit nersualaarneqarpoq.
- Jannep
tunniusimalluni Royal Greenlandimi sulisimaneranut qutsavigiumavara. Piffissami
allanngorarfioqisumi nunatsinni suliffeqarfiit annersaasa siunissaata
nukittuujunissaa nunatsinni innuttaanilu aallaaveqarluinnarnissaa
suleqataaffigisimavaa, Maliina Abelsen.
Janne Moltke-Leth Royal
Greenlandip siulersuisuini ilaasortatut kia paarlassaneraa Naalakkersuisut suli
aalajanginngilaat.
