Pissatat annaasallu nalunaarutigissavaat
Piniarneq pillugu siunnersuisoqatigiit pissutsit eqqumaffigiineqartariaqartut arlallit oqaluuseraat
Siullertut pisanik nalunaaruteqartarnerup pingaaruteqassusaa, aappaattuta rfernik pilaavissat sulissutigineqarnerulertariaqarnerat, pingajuattut kalaallit nerisassiaannik atuinerulernissamik tapersersuineq, naggataatigullu umimmaat illersugaanerat piniagaanerallu pillugit nalunaarummut missingersuummi ulluni arfineq marlunni tunisisinnaatitaaneq pillugu malittarisassap peerneqartariaqarnera, taama piniarneq pillugu siunnersuisoqatigiit siulittaasuat, Adam Dahl, tusagassiutinut nalunaaruteqarluni allappoq.
Piniarneq Pillugu Siunnersuisoqatigiinnit maluginiaqquneqarpoq, pisanik nalunaaruteqartarnerup qanoq pingaaruteqartiginera. Tassani ilaallutik pisaasimasunik eqqortumik nalunaaruteqarnissaq, pissatat annaasallu ilanngullugit. Taamaalilluni Naalakkersuisup Ane Hansenip innuttaasunik ataatsimiititsisarnermini oqariartuutigisartagaa, piniarnermik allagartallit pisaminnik nalunaaruteqartarnerminnik pitsanngorsaasariaqartut, Piniarneq Pillugu Siunnersuisoqatigiit tapersersorpaat.
Nalunaarut atuuttoq malillugu, pisat tamarmik, pissatat annaasallu ilanngullugit pisanik nalunaarsuiffik atorlugu nalunaarutigineqassapput. Paasissutissat tamakkua uumasoqatigiiaanik, tamakkunanngalu Kalaallit Nunaata sineriaani peqassutsinik aqutsiveqarfimmut Pinngortitaleriffimmullu paasissutissiisarput. Aammattaaq paasissutissat tamakkua piniakkanik killilersukkanik pisassiinermi tunuliaqutarineqartarlutik.
Arfernik angisuunik pisassiissutit atorluarneqarnerulernissaat anguniartillugu, Piniarneq Pillugu Siunnersuisoqatigiit isumaqarput Namminersorlutik Oqartussat kommuunillu, pilaavit ullutsinnut naleqqunnerusut pilersinneqarnissaat sulissutiginerusariaqaraat. Suliap tamassuma aamma piniartut pisuussutinik taakkunannga atorluaanerulernissaannik periarfississavaat. Sinerissami pilaffissatigut atugassarititat assigiinngiiaaqaat, amerlasuutigullu pilaffissaqannginneq pilaffissalunnerlu arfernik angisuunik pisaqanngittoorutaasarluni. Inuussutissalerinerup sammineqarnerulerneratigut, pilattarfiit pilertornarnerusut pisariaqartut Piniarneq Pillugu Siunnersuisoqatigiit isumaqarput, piniarneq pillugu siunnersuisoqatigiit siulittaasuat, Adam Dahl, tusagassiutinut nalunaaruteqarluni ilaatigut allappoq.
Piniarneq Pillugu Siunnersuisoqatigiit Sisimiuni oktobarip 6-ani aamma 7-ani ataatsimiippoq.