Piujuartitsineq aallaavigalugu suliffimmik ineriartortitsineq Kalaallit Nunaanni siuarsaassaaq
Industriens Fond, Sulisitsisut aamma CSR greenland ”IPUK – piujuartitsineq aallaavigalugu suliffimmik ineriartortitsineq” qulequtsiullugu suliniummik nutaamik saqqummiussipput. Kalaallit Nunnaanni aningaasarsiornikkut siuariartornissaq suliffissanillu piujuartitsinermik aallaaveqartumik ineriartortitsinissaq aammalu FN-ip piujuartitsilluni ineriartortitsinermi nunarsuarmi anguniagai aallaavigineqassasut suliniummi siunertaavoq.
Suliniummi nutaami nunamit suliffeqarfiit qulit suliaqassapput, tassani FN-ip piujuartitsilluni ineriartortitsinermi nunarsuarmi anguniagaanik 17-iusunik angusaqarnissamut ikiuutaasinnaasut aaqqiissutissat tigussaasut ineriartortinneqassallutik.
Piujuartitsineq suliffeqarfinni atorneqalissaat, suliffeqarfiillu periusissiaannut ilanngunneqarnissaa eqqarsaataalluni - tamanna inuiaqatigiinni siuarsaassaaq, suliffissaqartitsissaaq pitsaasumillu ineriartortitsissalluni.
Suliniummut nutaamut CSR Greenlandimit aqunneqartumut ilaatigut tamanna tunngavilersuutigineqarpoq, novembarillu qaammataani nunat avannarliit FN Global Compactimi attaveqaatasa Nuummi ukiumoortumik ataatsimeersuarnissaasa tungaanut assigiinngitsorpassuarnik suliaqarsiussalluni.
Maligassiuisuussasut
Aaqqiissutissat tigussaasut saniatigut ineriartortitsisoqassaaq, suliffeqarfiit taamaalillutik Kalaallit Nunaanni nunanilu allani unammilligassanik pingaaruteqarnerpaanik aaqqiissuteqarnissamut aningaasarsiornikkut aamma piujuartitsisumik periusissiornikkut qanoq sulisoqarsinnaaneranut suliffeqarfinnut allanut maligassiuisuussallutik.
- Pingaaruteqarluinnarpoq, piujuartitsinerup aamma FN-ip nunarsuarmi anguniagaanik suliaqarnerup pilersaarusiorneqartarnissaat aamma suliffieqarfiit niuernerannut attuumassuteqartarnissaat. Tamanna suliffeqarfimmi suliassat salliutitassat kingullerpaavaniinni salliutinneqarnerpaasariaqarpoq, Sulisitsisut pisortaat Christian Keldsen oqarpoq.
- Tamanna salliutinneqaruni niuermi periarfissat nutaat unammilleqatigiissinnaanerlu nutaaq ammaanneqassapput. Kalaallit Nunaanni Sulisitsisut tamanna ukiut qulit sinnerlugu ingerlassimavaat, suliniullu Kalaallit Nunaanni suliffeqarfiit siumut allartinneqarnissaannut periarfissatsialaavoq, taanna oqarpoq.
Periarfissarpassualik
Sulisitsisut CSR Greenlandillu piujuartitsisumik suliaqartarneq ukiut qulit matuma siornatigut aallartissimavaat. Suliffeqarfiillu piujuartitsisumik FN-illu nunarsuarmi anguniagaanik pilersaarusiortarnermik suliaqarnissamut periarfissarpassuaqarput, aamma Kalaallit Nunaanni suliffeqarfiit alloriaqqinnissamut tapersersorneqarnissamik isumassarsitinnissamillu ujartuinerusalersimasut oqaatigineqarpoq.
- Kalaallit Nunaanni suliffeqarfiit inuiaqatigiinnut akisussaaffeqarneq suliffeqarfimmik ingerlatsinerup ilaanut ilaatereerpaat. FN-ip nunarsuarmi anguniagaqarneratigut piujuartitsinermut atatillugu ataatsimut ’oqaaseqalersimavugut’, taamaalilluta immikkoortortat nunalu akimorlugit sammivimmut ataatsimut ingerlalersimalluta, CSR Greenlandimi suliniummut aqutsisoq Ulla Lynge oqarpoq.
Suliniut ”IPUK – piujuartitsineq aallaavigalugu suliffimmik ineriartortitsineq” CSR Greenlandip martsip 15-iani ataatsimeersuarnerani saqqummiunneqassaaq, taamalu apriilip qaammataani ataatsimeersuartoqarnerani suliaralugu aallartinneqassalluni.