Piujuartitsisumik umiarsuarnik takornariartitsineq: Kalaallit Nunaat siuttuussaaq
Umiarsuit nutaat batteerinik ikummatissanillu ingerlatillit, avatangiisinik mingutsitsinnginnerusut, aasamut Kalaallit Nunaannut tikittaleriissapput.
Kalaallit Nunaat piujuartitsinermik tunngaveqartumik takornariartitsinermi siuttuussaaq, kisianni siuariartorneq kissaatigineqartoq akisussaassuseqartumik pinngortitamut kulturimullu mianerinnittuussaaq.
Aviisi AG taama allappoq.
Minnerunngitsumik umiarsuarnik takornariartaatinik takornariartitsinermi. Kalaallit Nunaat ukiuni aggersuni umiarsuarnik takornariartaatinik nutaanik minnerusunillu, taakku umiarsuarnit nutaannginnerusunit avatangiisinut mingutsitsinnginnerupput. Visit Greenlandimi pisortaq, Hjörtur Smarason, taama oqarpoq.
- Piujuartitsisumik takornariartitsinermut tunngatillugu Kalaallit Nunaat tikitassani siuttunngornissaa anguniaraarput – aamma umiarsuarnik takornariartaatinik takornartitsinermut tunngatillugu. Suli anguniagarput angunngilarput, kisianni illoqarfiit nunaqarfiillu umiarsuit tikittagaannut pitsaanngitsumik sunniutit annikillisarnissaat aamma misigisat pitsaasut siuarsarnissaat ukkataraagut, Hjörtur Smarason, AG-mut taama oqarpoq.
Umiarsuit takornariartaassuit ataatsimut isigalugit nunarsuarmi sumiiffinni arlalinni tikilluaqqusaannginnerulernikuupput. Umiarsuarnilli takornariartaatinik takornariartitsisarneq ataatsimut isigalugu annertusiartorpoq. Piujuartitsinissamullu piumasaqaatit aamma annertusiartorput.
- Umiarsuarnik takornariartitsisarnerup umiarsuarnut mingutsitsinnginnerusunut allanngoriartulernerannik kinguneqarpoq. Tamanna aamma Kalaallit Nunaanni takuarput, tikerarfiusup tulliani umiarsuit nutaat arlallit siornatigut takusimanngisagut takussavagut. Umiarsuit hybridit, umiarsuarnit pisoqaanerusunit piujuartitsinerusinnaassusillit. Umiarsuilli pisoqaanerusut suli atorunnaanngillat, Hjörtur Smarason, taama nassuiaavoq.
Aviisimi AG-mi atuarnerusinnaavutit: