Umiatsiaararsortut pisassiissutinik
niuerutigineqarsinnaasunik nammineq pigisanik, PNNP-nik, pigisaqartut
pisassiissutit ukiumoortut nungukkunikkit, aalisarnerlu ingerlateqqissagunikku
pisassiissutinik allanik piseqqaartariaqarput.
Aningaasanilli
uninngasuuteqanngikkunik pisassiissutinullu pisinissamut akissaqanngikkunik
aalisarneq unitsittariaqassavaat.
Umiatsiaararsortut pisassiissutinik
niuerutigineqarsinnaasunik nammineq pigisanik, PNNP-nik, pigisaqartut
pisassiissutit ukiumoortut nungukkunikkit, aalisarnerlu ingerlateqqissagunikku
pisassiissutinik allanik piseqqaartariaqarput.
Aningaasanilli
uninngasuuteqanngikkunik pisassiissutinullu pisinissamut akissaqanngikkunik
aalisarneq unitsittariaqassavaat.
Taamaattumik PNNP atorlugu aalisarneq
umitsiaararsortunut nutaajummat, taakku aningaasanik akisussaassuseqartumik
aqutsisinnaanermut siunnersorneqartarnissaat pisariaqartoq, naatsorsuuserisoq
namminersortoq aalisartunillu qanimut suleqateqartoq kiisalu Kalaallit Nunaanni
Aalisartut Piniartullu Siunnersuisoqarfiat, AAPISI, isumaqarput.
Iluarisimaarneqartoq mianersorfissaqartorli
Aqutsiveqarfik 47- mi qaleralinniarluni aalisarnermi
pisassiissutit niuerutigineqarsinnaasut nammineq pigisat umiatsiaararsortunut
atuutsinneqalerpata, tamanna atugarissaarnerulernissamut aqqutaassasoq,
Aalisarnermut Piniarnermullu Naalakkersuisoq Kim Kielsen, Siumut, siorna
Inatsisartut upernaakkut ataatsiminneranni inatsisissap annertuumik
oqallisigineqarnerata nalaani, aalisartunut aalisarnermillu kattuffinnut
aalisarnermik inatsisissap atuutsinneqalernissaanut ernumassuteqartunut
eqqissisaalluni arlaleriarluni oqaatigaa.
Aalisarnermullu inatsit nutaaq januarip aallaqqaataani
atuutilersoq naapertorlugu umiatsiaararsortut paggatassiilluni
qaleralinniarnerluni aalisarnermiit pisassiissutinik niuerutigineqarsinnaasunik
nammineq pigisanik, PNNP-nik, pigisaqalernermut nuuttut siunissamut
isumalluartut, aaqqiissummullu nutaamut iluarisimaarinnittut arlallit
Sermitsiamiit oqaloqatigaagut.
Taamaakkaluartoq paggatassiissutit atorlugit aalisarnermut
naleqqiullugu PNNP atorlugu aalisarnermi mianersorfissat arlaqartut
umiatsiaararortunik ulluinnarni qanimut sullitaqartartut isumaqarput.
Pisariaqartitsisoqartoq
Nukajaraq Olsen naatsorsuuserisuuvoq namminersortoq,
taassumalu aalisartunut piniartunullu ajornanngitsumik akissarsianut
naatsorsuuserinermilu immersuivissaq AalisaLøn, maannakkut umiatsiaararsortunit
angallataatilinnillu 50-it missaanniittunit atorneqartoq, ukiuni arlalinni
ineriartortissimavaa.
- Umiatsiaararsortunut tunngatillugu
ingerlatsinermut aningaasartuutit tamaasa eqqortumik nalunaarsornissaat,
taakkulu aamma akileraartarnermut pisortaqarfimmut nalunaarutigineqartarnissaat
pingaaruteqarpoq, taanna oqarpoq.
- Umiatsiaararsortut PNNP-mut nuussimasut
aalisarnertik ingerlatiinnassagunikku aningaasanik uninngasuuteqartariaqarput,
taamaanngippammi aalisarnerup ingerlatiinnarnissaa
ajornakusoortorujussuanngorsinnaavoq.
- Upernavik Uummannaq taakkulu nunaqarfii tikinnikuuakka,
tassanilu aalisartut oqaloqatigalugit. Tassani aalisartut aningaasaqarneq
pillugu siunnersorneqarnissamik pisariaqartitsisut malunnarpoq, taanna
oqarpoq.
Eqqumaffigineqartut
Kalaallit Nunaanni Aalisartut Piniartullu
Siunnersuisoqarfiat, AAPISI, Qalerualinniat Aalisagarniallu Kattuffiata ataani
inissisimasoq, sinerissap qanittuani umiatsiaararsortunut siunnersortaavoq,
PNNP-llu umiatsiaararsortunut atuutsinneqalernerata kingorna aningaasaqarneq
pillugu siunnersorneqarnissamik pisariaqartitsineq suli annertunerulersimasoq,
siunnersorti Siverth Amondsen oqarpoq.
- Umiatsiaararsortut amerlasuut aalajangersimasumik
naatsorsuuserisoqarneq ajorput, taakkulu ukioq nutaamiik PNNP atorlugu
qaleralinniarlutik aalisalersimagunik, aningaasaqarneq pillugu
siunnersorneqarnissaat siornatigumut naleqqiullugu annertuneruvoq.
- Taamaattumik sulinitsinni taakkorpiaat
maannakkut sulinitsinni annertunerusumik eqqumaffigaagut, taanna oqarpoq.
Namminersorlutik Oqartussani Aalisarnermut Piniarnermullu
Naalakkersuisoqarfiup ataani aalisarnermut immikkoortortaqarfimmi
immikkoortortami pisortaq, Kathrine Kærgård, naapertorlugu, ukioq nutaaq
aallarnerfigalugu umiatsiaararsortumut PNNP tunniunneqartoq annerpaaq 73 tonsit
missaanniippoq, minnerpaarlu 200 kilo missaaniiluni.
