Polar Seafood Denmark A/S piginneqataassutinik tunisaqalersoq
Islandimi suliffeqarfik Brim hf. Polar Seafood Denmark A/S-imi piginneqataalissaaq. Piginneqatitsialak, siulersuisut siulittaasuat Henrik Leth oqarpoq.
Polar Seafood Denmark A/S Islandimi aalisarnermik suliffeqarfissuarmit Brim hf.-imit piginneqataaffigineqalissaaq.
Taama pisoqassaaq Polar Seafood Denmark A/S-imi piginneqataassutit 50 procentii, piginneqataassutit qallunaanit Helge Nielsenimi kiisalu Bent Norman Petersenimit aamma Louise Schouv Petersenimit pigineqartut, Islandimiunut tunineqarpata, Polar Seafood Denmark A/S-imit tusagassiuutitigut nalunaarutigineqarpoq.
Piginneqataassutit sinneruttut 50 procentit Polar Seafood Greenland A/S-imit pigineqaannassapput. Nuussinissamut oqartussat nalinginnaasumik akuersissutiginnissaat aalajangiisuussaaq.
- Brim hf. Piginneqatissaqqilluinnartuuvoq, ingerlatseqatigiiffiit imminnut ataqatigiilersilluartuummata, Henrik Leth, Polar Seafood Greenland A/S-imi aamma Polar Seafood Denmark A/S-imi siulersuisut siulittaasuat, oqarpoq.
Henrik Lethip tunisinerup eqqoqqissaartumik nalinga Sermitsiaq.AG-mut oqaatigerusunngilaa. Taamaattorli millionit pingasunik kisitsisitallit annertujaat tunisisunut pingasunut taakkununnga tuttussanngornerat pineqartoq oqaatigisinnaanerarpaa.
Polar Seafood Denmarkip naatsorsuutai kingulliit naapertorlugit ingerlatseqatigiiffik 2021-mi 3,8 milliarder koruuninik kaaviiaartitaqarsimavoq namminerlu aningaasaatinik 1,4 milliarder koruuninik aningaasaateqarluni.
Pisortaaninngortussaq
Henrik Leth Polar Seafood Greenland A/S-imi aamma Polar Seafood Denmark A/S-imi siulersuisut siulittaasuattut ingerlaannassaaq, ilaatigut piginneqataassutinik Brim hf.-imut tunisinerup unammilleqatigiinnermut oqartussanit akuersissutigineqarnissaata tungaanut.
Tamatuma kingorna Helge Nielsen, Polar Seafood Denmark A/S-imi pisortaanerusoq, kingoraartaaffigissavaa. Henrik Leth siuariartornerup malunnaateqarluartup Polar Seafood Denmark A/S-imi ukiuni kingullerni malunnaateqarluarsimasut aalajangiusimanissaanik annertusarnissaanillu suliassaqassaaq.
- Helge Nielsen Polar Seafood Denmark A/S-imilu sulisut sulilluarsimapput, aamma aqqut taanna nangillugu ingerlaqqissaagut. Tamatuma peqatigisaanik iluaqutissat Brim hf.-ip piginneqataalerneratigut tunniunneqarsinnaasut suussusersiniassavakka ineriartortillugillu, Henrik Leth, ingerlatseqatigiiffinnut taakkununnga marlunnut suleqatigiinnikkut aallavimmik nukittuumik takusaqarsinnaasoq, oqarpoq.
Suleqatigiilernissamut qilanaartut
- Suliffeqarfik arlalippassuartigut Polar Seafoodimi suliffeqarfissuarmi Islandimi assigaa: Nammineq kilisaataatit atorlugit aalisarneq, kilisaatini nunamilu suliarinninneq taavalu tuniniaaneq. Pisoqaassutsikkut naligiippugut, angissutsikkut naligiippugut aamma sorpassuarnut assigiinnik isiginnittaaseqarpugut. Tassa imaappoq sulisutsinnik, pisisartutsinnik pilersuisutsinnillu pinnittarnitsinni akisussaassuseqarneq peqqissaarussinerlu – aamma pinngortitamut piusinnaanitsinnut tunngaviusumut peqqissaarussineq, Henrik Leth oqarpoq.
Brim hf. Islandimi aningaasanik pappiaranillu nalilinnik niuerfimmi nalunaarsorneqarsimavoq Gudmundur Kristjanssonimit pingaarnertut piginneqataaffigineqarluni. Taanna Henrik Lethitulli naleqartitani ataatsimoorussani tunisaqartarnikkullu aqqutini assigiinngitsuni periarfissanik pitsaasunik takusaqarsinnaanerarpoq.
- Suliffeqarfimmik peqqissumik ingerlalluartumillu Polar Seafood Denmark A/S-itut ittumik piginneqataalernissatsinnut qilanaarpugut. Suliffeqarfiit assigiittorujussuupput, aamma suliarpassuit assigiimmik suliarisarpavut, tamannalu ingerlatiinnassavarput. Tamatuma peqatigisaanik qanoq immitsinnut nukittorsaqatigiissinnaanerput takussallugu pissanganassaaq, oqarpoq.