Polar Seafood: Inuussutissarsiuummut kingunerluutit

Pisassiissutit qaffasinnerpaaffissaannut naatsorsuinermi toqqaannanngitsumik piginnittut ilanngunneqarnissaat, aalisarnermut inatsisissatut siunnersuutip siunnersuutigaa. Tamanna akuerineqarpat aalisartorpassuarnut piniartorpassuarnullu kingunerlutsitsissaaq, Polar Seafoodimilu pisortat Miki Brøns aamma Bent Salling aalisarnermut naalakkersuisoqarfimmut sakkortuumik kaammattuipput:

- Pisassiissutinik killiliinermut atatillugu toqqaannanngitsumik piginnittut ilanngunneqassanngitsut kaammattueqqittariaqarpugut.

Polar Seafood (PSG) ullumikkut aalisartunut piniartunullu 200-nit amerlanerusunut aningaasaqarnikkut susassaqarfeqartoq, pisortat oqarput.

Millionit marlunnik kisitsisitallit amerlassusaat

- Katillugit millioninik marlunnik kisitsisitalinnik amerlassuseqarput.

Isumaqatigiissutini taakkunani aalisartut piniartullu pisaminnik, pingaartumik raajanik, qaleralinnik saarullinnilluunniit, Polar Seafoodimut tuniseqqusaapput, taakkualu tunisinermi akigititanit taarsigassarsiat akilerneqartarput.

- Aalisarnermut Piniarnermullu Naalakkersuisoqarfiup aalisartut ikinnerit pisassiissutinik amerlanerusunik pissarsinissaat qulakkeerniarlugu ilaatigut sinerissap qanittuani qaleralinniarneq IOK-mik taaneqartartoq atuutilersinniarlugu kissaatigaa, taamaalillunilu aalisarneq inuussutissarsiutaalersinnaanngortinniarlugu, inuillu ataasiakkaat aningaasaqarniarnerat pitsaanerulersinniarlugu, taamaalillunilu aalisarnermut aningaasaliisoqarsinnaanngorlugu. Inatsisissap ilaa tamanna isumaqatigivarput.

- Taamaattorli aalisartut piniartullu taakkua ilarpassui sumiiffinni niuernikkut aningaaserivinnik ullumikkut atuiffiunngitsuni najugaqarlutillu aalisartuusut Aalisarnermut Piniarnermullu Naalakkersuisoqarfiup puigorpaa. Kalaallit Nunaanni aningaaseriviit angallatinut minnerusunut taarsigassiisarnermikkut pisassiissuteqartarnermikkullu mianersortarput, taamaattumillu tunisineq qulakkeerniarlugu PSG-p suliassaq tamanna isumagisimavaa.

Angallatinut pisassiissutinullu qularnaveeqqut

- PSG-p atorniagaasa amerlanersaat toqqaannanngitsumik pisassiissutinik piginnittuunermut tunngasuupput, tassami aalisariutit pisassiissutillu anginerusut sillimmatitut atortarpavut - IOK-p atuutilersinneqarnerata kingorna tamanna ingasatsikkiartuinnassaaq, aalisartummi pisassiissutinik pisiumasut aningaasanik pisariaqartitsilersinnaapput.

- Inuilli inatsisitigut akuerisaasut sinerissap qanittuani qaleralinniarneq pillugu pisassiissutinik 2,5 procentiinit amerlanerusunik toqqaannanngitsumik piginnittuusinnaanngillat, taamaattumik aalisartut IOK-mut ilannguppata taarsigassarsiat amerlasuut atorunnaarsinneqartariaqarput, taamaalillunilu PSG aningaasaliissuteqarnerusinnaajunnaassaaq, taamaalillunilu Aalisarnermut Piniarnermullu Naalakkersuisoqarfiup IOK-mik atuutilersitsiniarluni siunertaa taperserneqassalluni.

- Aalisartunut raajanik qerititanik tunisisartunut taarsigassarsiat aamma taamaalissapput.

Inuttut akiliisinnaajunnaarnerit annilaangassutaasut

- Kalaallit Nunaanni suliffeqarfiit aningaaseriviillu allat piumasaqaatinik taakkuninnga tigusinissaannik upperinninnginnerput pissutigalugu maannamit taarsigassarsisitsisarunnaarpugut suliallu misissulerlugit, pisassallu killiliiffigineqarnerat atuutilerpat pisassat killiliiffigineqarnerannut inatsimmi killiliussaq qaangerniarnagu pisussaaffiit arlallit atorunnaarsittariaqalernissaat ilimagisinnaavarput.

Miki Brønsimit Bent Sallingimillu oqariartuut alianartoq imaappoq:

- Ajoraluartumik inuttut akiliisinnaajunnaartoqarsinnaavoq.