- Polar Seafood pingasunik kisitsisitalinnik millionilikkaanik aningaasaliiffigaarput

Nunatsinni soraarnerussutisiaqalernissamut aningaasaateqarfiit annersaat SISA, 44.000-it sinnerlugit ilaasortaqarlunilu sullissaqartoq, kilisaataatileqatigiiffissuarmut Polar Seafood Greenland A/S-imut pingasunik kisitsisitalinnik millionikkaanik aningaasaliivoq.

- Taamatut allassinnaavutit, SIK-p soraarnerussutisiaqalernissamut aningaasaateqarfiani siulittaasoq Jess G. Berthelsen Sermitsiamut taama oqarpoq.

Suleqatigiinneq tamanna SISA-p annertuumik aningaasaliineratut oqaatigineqarsinnaavoq. Polar Seafood aamma soraarnerussutisiaqalernissamut aningaasaateqarfik oktobarip aallaqqaataanni tupaallannartumik nalunaaruteqarmata, tassa Polar Seafood avataaneersumit siullermeerluni aningaasaliiffigineqartoq, SISA-p millionilikkaanik aningaasaliinera siullermeerluni saqqummiunneqarpoq.

SISA, Polar Seafood Greenlandimi piginneqataassutit 5 procentiinik pisivoq. Ukiunilu tulliuttuni qulini soraarnerussutisiassanut aningaasaateqarfik 10 procentinik piginneqataassuteqarnerulerniarnersoq, SISA-p aalajangersinnaavaa.

Ukioq manna oktobarip aallaqqaataata tungaanut aalisarnermut suliffeqarfissuaq Polar Seafood Greenland 100 procentimik pigineqarpoq pisuunit Miki Brønsimit qatanngutigiinnillu Laila aamma Bent Friis-Sallingimit. Piginnittunili SISA-p ilanngunneratigut suliffeqarfissuarmi 95 procentimik piginnittuulerput.

Siulittaasoq: Pisineq neriulluarnartoq

Suliffeqarfimmut aningaasaliinissaq ilaannikkut orniginarnerusarpoq, soorlu SISA-p Polar Seafood Greenlandimut, Nunatsinni suliffeqarfiit namminersortut annersaannut, aningaasaliineratigut tamanna pisoq.

- Aningaasaliissutitta naammaginartunik erniaqarnissaat neriuutigaarput.

- Aalisarnermut aningaasaliinissaq ukiorpassuarni eqqarsaatigisimavarput, tamannali aalisarnermut inatsisitoqqap atuunnerani ajornarsimalluni. Ingerlatseqatigiiffimmut aningaasaliivugut aalisarnermut inatsisip nutaap, isumaga naapertorlugu pitsaasup, aalisarnermi piginneqataassutit siammarnissaannut periarfissiimmat. Tamanna aalisartut peqatigalugit ukiorpassuarni piumasarisarparput, aalisarnermik ingerlatsisut ikippallaarnerat pisassiissutillu naammagittaalliuutigisarnikuugatsigik.

- Taamaattumik suliffeqarfimmut piginneqataalernerput neriulluarnarpoq. Ilaasortavut 44.000-it Polar Seafoodimut maanna piginneqataalerput, Jess G. Berthelsen oqarpoq.

Soraarnerussutisiaqalernissamut aningaasaateqarfik Nunatsinni ingerlatseqatigiiffinnut siornatigut aningaasaliisarsimasoq, Jess G. Berthelsenip nassuerutigaa, „tamannali iluatsippallaarsimanani”. Allatut oqaatigalugu ingerlatseqatigiiffiit tamakkua annaasaqaataasarsimapput. Jess G. Berthelsenilli taakku kikkuunerat tamanut saqqummiukkusunngilai.

Suliffeqarfik annaasaqaataasussaanngitsoq

SISA-lli suliffeqarfissuaq Polar Seafood ukiorpassuarni iluanaaruteqarluartarsimasoq upperaa.

Qaleralittassiissutit, raajartassiissutit suluppaagartassiissutillu ikiliartoraluartut, suliffeqarfissuup 2024-mi akileraarutit suli ilanngaatiginagit 119 millionit koruuninik iluanaaruteqarnini takutippaa, 2023-mi 84 millionit koruuninik iluanaaruteqarsimagaluarluni.

SISA-mut pineqartoq tassaagami Polar Seafoodimut aningaasaliinikkut kalaallinut suliffissanik qulakkeerinninnissaq, nunami inuussutissarsiutit pingaarnersaata aalisarnerup nukittorsarneqarnissaa, suliffeqarfissuullu ineriartortuarnissaanut tapersersuinissaq.

- Inuiaqatigiimmi tamarmik aalisarneq pinngitsoorsinnaanngilaat aamma SIK-mi ilaasortat ilarpassui aalisarnermik suliffeqartuupput, Jens G. Berthelsen oqarpoq.

Danmarkimi nunanilu allani soraarnerussutisiaqalernissamut aningaasaateqarfiit aningaasaliisarfiillu allat suliniutinut assigiinngitsunut millionikkaanik milliardikkaanilluunniit amerlassusilinnik aningaasaliisarput.