Polar Seafood: Sooq pitsaasumik ingerlanerput ajorseriartinneqassava?

Aalisarnermut inatsisissami nutaami Polar Seafoodip nunami inuussutissarsiutit pingaarnersaannut, tassa aalisarnermut, sunniuteqangaarunnaarnissaa siunnersuutigineqarpoq.

Kisianni sooruna?

Polar Seafoodimi pisortaasut piginneqataasullu Miki Brøns aamma Bent Salling Sermitsiaq.AG-mit apersorneqarnerminni taama aperisariaqarput.

- Kalaaliuvugut, suliffeqarfiullu pitsaanerulernissani, sunniuteqarluarnerulernissani suleqatigiinnerillu aqqutigalugit inuussutissarsiornermik ilisimasanik aningaasaliinernillu inuiaqatigiinnut iluaqutaasunik siuarsaaniarluni suliniuteqartuaannarsimavoq, isumaqatigiillutik oqarput.

Sunaana ajoqutaasoq?

- Ingerlatseqatigiiffiup sinneqartoorutai ataatatta ukiut tamaasa kilisaatinut nutaanut aningaasaliissutigisarlugillu aningaasaliissutigeqqittarsimavaat, periarfissaqarfitsinnilu pitsaanerulersitsiniartarsimallutik. Tamanna ajorpa? Aningaasammi pissarsiarisavut ingerlatseqatigiiffimmut Kalaallit Nunaannilu aningaasaliinernut atorpavut, Polar Seafoodimi pisortat marluk taama oqarlutik piviusut innersuussutigaat:

- Akitsuutit, ingerlatseqatigiiffinnut akileraarutit isertitallu akileraaruserneqarnerat aqqutigalugit 2021-miinnaq inuiaqatigiinnut 445 millionit koruuninik ingerlatseqatigiiffik tapiissuteqarsimavoq. Tamatuma saniatigut suliffissarpassuaqarpoq, nunamullu avammut tunisinermi isertitaqarluarluni. Aalisarnermut inatsisissatut siunnersuut nutaaq ukiut qulikkuutaat arlaqanngitsut matuma siorna piviusunngorsimasuuppat tamanna ajornarsimassagaluarpoq.

Piginneqataaneq pisassanillu killiliineq

“Raajarniarnermi piginneqataassutit naatsorsorneqarnerannut periutsip nutaap aamma pisassiissutit 20 procentimik qaffanneqarnerisa kingunerisaanik Polar Seafood Greenland A/S-ip piginneqataassutit TAC-p 8 procentiata missaaniittut tunissavai (2023-mi raajanut TAC-mut sanilliullugu 8.500 tonsit missaanniittut). Polar Seafood A/S-ip pisassiissutit 20 procentii sinnerlugit piginngilaa, ingerlatseqatigiiffinnili allani piginneqataassuteqarluni, taakkulu piginneqataaffigiunnaartariaqarpai.”

"Inatsisit tunngavigalugit aalisarnermi tamani inuttut ataasiakkaatut pisassiissutit 10 procentimik killilerneqassapput. Inuttut ataasiakkaatut pisassiissutit killilerneqarneranni ilaquttat qaniginerpaasat, soorlu angajoqqaat, meeqqat, aappat qatanngutillu inuttut ataasiakkaatut isigineqassapput. Inunnut ataasiakkaanut pisassiissutit killiliineratigut ilaqutariit pingasut pisassiissutigineqartunit amerlanerusunik pigisallit eqqugaassapput.“

Aalisarnermut inatsisissatut siunnersuut tamanut ammasumik saqittaassutiginiarnagulu ikuallakkumallugu kissaateqanngillat, soorlu Maniitsumi aalisartut sapaatip-akunnialui matuma siorna taamaaliorsimasut. Aammattaaq Kalaallit Nunaat pingaartippallaarpaat, Issittumimi nunarsuarmi aalisarnerup pitsaanerpaamik ingerlanneqarnissaa aatsaat ineriartuutaasumik oqaloqatigiinnikkut anguneqarsinnaammat, „pissusiviusut tunngavigalugit- misigissutsit pinnagit“, soorlu taama oqartut.

Pissutsit atugarineqartut attatsiinnarneqarsinnaanngillat

- Aap, aalisarnermut inatsisip nutaap aalisarnermik inuussutissarsiuteqartut tamarmik utaqqisimasaata ilusilersorneqarneranut ilumoorluta ajunngitsumik peqataarusuppugut. Ukiorpassuarnimi sinaakkutissat suut atuutissanersut nalornissutigineqarsimanerat attatiinnarneqarsinnaasimanngilaq. Nalorninerup aningaasaliinissamut periarfissat sunnersimavai. Ineriartornissamut siuariartornermullu sinaakkutissat aalajaallutillu ilisimaneqarluartut pisariaqarput, taamaalilluni inuiaqatigiit aalisakkat raajallu nunarsuarmiittut sapinngisamik pissarsiffiginerpaasinnaassagamikkit, Miki Bentilu oqarput.

Inuussutissarsiutip sinaakkutaasa "ineriartuutaasinnaasumik" allanngortinnissaa pingaaruteqartoq isumaqarput.

Inuiaqatigiit politikkikkullu partiit ilaasa Polar Seafoodip inissisimaffia ajornartorsiutitut isigisarmassuk Polar Seafood ukiut ingerlaneranni arlaatigut kukkussuteqarsimassasoq nassuerutigaat.

Qaqisunimmi iluarisaqannginnerunerpa, qatanngutigiit akornanni isumaqatigiinnginneq imaluunniit... Aap, sunaana pissutigalugu mamiatsattoqartoq suliffeqarfiit namminersortut annersaat inatsisissatut siunnersuutip nassuiaataani aqqatigut taaneqarmat, tassanimi aalisarnerup pitsaassusiata akerlianik aalisarnermik piginnittut siammarterneqarnissaat pingaarnertut sammineqarpoq.

Ineriartuutaasumik oqaloqatigiinnissaq

- Nalunngilarput piffissap anersaavanut naapertuuttumik iliuuseqartariaqarluta, tassani ammasuuneq ersarissumillu paasissutissiisarneq pingaarnersaapput. Tamanna qularutissaanngilaq, aamma tamatta isumaqatigiippugut tamanna pingaarnerpaasoq, oqarput.

- Tusarniaanermut akissutit aalisarnermut naalakkersuisoqarfimmut nassiunneqarput. Oqartussaassuseqarneq ataqqivarput – utoqqatseqqillutalu uteqqissavarput – ineriartuutaasumik oqaloqatigiinnissamut peqataarusuppugut, nunap isertitaqarnerulernissaanut allannguutit kingumut alloriarneroqqunagit, oqarput erseqqissaallutillu:

- Innuttaasut allat assigalugit nunarput nammineersinnaassasoq kissaatigaarput, tamannali anguniarlugu suleqatigiittariaqarpugut pitsaanerpaanillu sinaakkuteqartariaqarluta avatangiisinut aningaasaqarnermullu piujuartitsisunik aalisarsinnaaniassagatta, Miki Brøns aamma Bent Salling oqarput.