Politiit PET-illu Utoqqarmiut Kangerluarsunnguanni isumannaallisaaneq nalilersorpaat
Utoqqarmiut Kangerluarsunnguanni erngup nukinganik innaallagissiorfik pilersuiunnaarmat inuiaqatigiinni pingaarutillit eqqugaapput.
Utoqqarmiut Kangerluarsunnguani innaallagissiorfiup Nuullu akornanni ledningit Kalaallit Nunaanni attaveqaasersuutinut pingaarutilerujussuupput. Innaallagissiorfik pingasoriaammik pilersuisinnaanngorlugu allilerneqarpat, siunissami pingaaruteqassusaa annikinnerulernavianngilaq.
Aviisi Sermitsiaq taama allappoq.
Tamanna tunngavigalugu Kalaallit Nunaanni Politiit Politiillu isertortumik paasiniaasartuisa juulli sioqqullugu Utoqqarmiut Kangerluarsunnguat tikeraarpaat, ulorianartorsiortitsinerup annertussusaa nalilersorniarlugu minnerunngitsumillu nukissiorfik arlaannik pissuteqarluni unitsinneqarpat upalungaarsimanermut qanoq kinguneqarsinnaanersoq nalilersorniarlugu.
Innaallagiaarunnerit sakkortuumik eqquisartut
- Nuummi novembarimi 2021-mi innaallagiaaruttoqarnerani Utoqqarmiut Kangerluarsunnguat Kalaallit Nunaanni attaveqarnermut pingaarutilerujussuusoq erseqqippoq. Utoqqarmiut Kangerluarsunnguani attaveqarneq kipineqaraangat, illoqarfiit pingaarnersaata ingerlaneranut eqquisarpoq. Kinguneri sukkasuumik siammartarput inuiaqatigiinnilu pingaarutillit eqqorneqartarlutik, Kalaallit Nunaanni Politiini pisortaq Jørgen Harlev oqaluttuarpoq.
Aviisimi Sermitsiami atuarnerusinnaavutit. Aviisi uani pissarsiariuk:
