Politikeri: Arktisk Kommandop RAL ikiortariaqarpaa
Kitaani sikoqarpallaarnera peqqutigalugu Mary Arctica Qeqertarsuup Tunuani illoqarfiit tikissinnaanngilai. Kristian Jeremiassenip Arktisk Kommando maanna kaammattorpaa sikumik aserortereqqullugu, innuttaasut nutaanik pisiassaqarsinnaaniassammata.
Pisiniarfimmi nillataartitsiviit imaqanngillat. Umiarsuarlu assartuut Aasiannut, Qasigiannguanut Ilulissanullu qaqugu tikissanersoq nalunarallarpoq.
Ullut arlallit issittareersorlu kitaata sikunerani RAL-ip imaatigut assartuutaata Mary Arcticap Qeqertarsuup Tunuanut sapaatip akunnera kingulleq tikinnissani taamaatiinnarpaa. Naak Qeqertarsuup Tunuani suli sikulluanngikkaluartoq, sumiiffiup kitaa sikuulereerpoq.
Inatsisartuni Kommune Qeqertalimmilu kommunalbestyrelsemi ilaasortap, Kristian Jeremiassenip (IA) Arktisk Kommando maanna ikiuuteqqullugu kaammattorpaa, Qeqertarsuup Tunuanut nioqqutissat tikiunneqarsinnaalerniassammata. Kristian Jeremiassen Qasigiannguaneersuuvoq, nioqqutissallu nungutsiternat aamma malugaa.
- Kaammattorpara Arktisk kommando piffissap taamaalinerani sungiusaatingalugu RAL ikiussangaa Diskobugtimut, tusagassiorfinnut nalunaaruteqarluni allappoq.
- Nerisassat peqqinnartut nungupput nunguillutik, nillataartitsiviit imaarupput pisariaqartunik nerisassanik allaat naatitaarulluni, taamaammat umiarsuaq Diskobugtimi pisariaqartipparput Diskobugti taamarsuaq sikuunngilaq, allappoq.
Tikiffissaq tulleq nalunarallarpoq
Aasianni Pisiffiup pisiniartartuni ilisimatereerpai nioqqutissat piffissami tullerni ikinnerujumaartut.
RAL nittartakkamini ilisimatitsivoq nalunarallartoq Mary Arctica Aasiannut, Qasigiannguanut Ilulissanullu qaqugu tulakkumaarnersoq.
Aasiannut tulannissaq tulleq 7. marts nalunaaqutaq 7.00 pilersaarutaagaluarpoq.
- Pilersaarutit malillugit Mary Arcticap ingerlaarnissaa tulleq MRY 206-imi pissaaq, sikulli qanoq innera malinnaavigiuarsinnassavarput periarfissaqalissagaluarpallu sioqqutsisumik Diskobugtimut tulassinnaassalluta, RAL nittartakkamini allappoq.