Poortuutit akitsuutaasa qaffannissaat amerlanerussuteqartunit akuerineqartoq

Ataasinngorpat naalakkersuisooqatigiit Inuit Ataqatigiit, Demokraatit aamma Kattusseqatigiit Partiiat nioqqutissanik eqqussuinermi akitsuut akuersissutigissavaat, taamaaliornikkut naatsorsuutigineqarpot nunatta karsiata isertitassai 10 million koruuninik amerlissasut.

Aamma taama qularnaatigaaq illuatungiuliuttut partiivisa Siumup aamma Atassutip akitsuummik qaffaanissaq itigartitsissutigissagaat, taakkumi isumaqarput akitsuutip qaffanneratigut kioskini aamma pisiniarfinni kaaviiaartitat eqqornerlunneqassasut.

Januaarip aallaqqaataanit akitsuummik qaffaanissaq isumaqarpoq, imeruersaatit eqqussukkat soorlu saftit allallu qalallugit pikkunarsakkat akitsuuserneqarnisaaq. Akitsuutip Nuuk Imermit immiaaqqat imeruersaatillu utertitakkanik puullit eqqornavianngilai, kisianni energidrikkit soqutigineqaqisut soorlu »Red Bull«, »Cult« aamma »Burn« aammalu juiciararpassuit pappiliaasanik puullit. Akitsuummik eqqorneqartussaanngitsut tassaapput imeruersaatit immummit sanaat, tassaallutik immiut nalinginnaasut kiisalu suut nunatsinni utertitsisarnermik aaqqissuussani ilaasut.

Nioqqutissat eqqussukkat puui 0,25 literi ataallugit imallit akitsuutaat 1,00 koruunimit 2,00 koruunimut qaffassapput. Imeruersaatit 0,25 literi qaangerpagit akitsuutaat 2,00 koruunimiit 3,50-imut qaffanneqassapput.

Naalakkersuisut naatsorsuutigaat imeruersaatinik tamakkuninnnga tikisitsisartut akiligassaq 10 million koruuniusoq atuisunut ingerlateqqissagaat, atuisullu immaqa tamakkuninnga atuinerat millisinneqassalluni. Illuatungiliuttut annilaanngatigaat, akitsuut kioskinik pisiniarfinnillu imeruersaatinik tamakkuninnga tuniniaasartut kaaviiaartitaat ima eqqorneqarnerlutsigissasut allaat ilaat matuinnartariaqassallutik. Naalakkersuisooqatigiilli naammagisimaarpaat imeruersaatit peqqinnanngitsut, kigutinik aseruisinnaasut aammalu pualavallaalernermut tunngaviusinnaasut akitsuuserneqarnissaat, immaqalu allaat qillertuusanik pappilissanillu nunaannarmut eqqaasarnermik millisitsisinnaasut.

Nioqqutissat puuisa akitsuutaat atuutsinneqalermat 1. januar 1993 suli qaffaaqqittoqarsimanngilaq aammalu partiit naalakkersuisuutitaqartut siunnersuutip siullermeerneqarnerani illuatungiliuttunut erseqqissaatigaat, akitsuut taanna Siumup naalakkersuisuutitaqarnerani eqqunneqartoq, inatsillu nioqqutissat eqqussorneqartut akitsuusersorneqarneranik inatsit Siumup naalakkersuisunut siulittaasorisimasaanik Lars-Emil Johansenimit aammalu aningaasaqarnermut naalakkersuisumit Emil Abelsenimit atsiorneqartoq.

Aningaasaqarnermut naalakkersuisoq Maliina Abelsen, Inuit Ataqatigiit inatsisartut ataatsimiittarfianni oqallinnermi naqissusiivoq: - Uagut ilaqutariit tassaagunarpugut akitsuummik nuannarineqanngitsumik eqqussisussat...