Puiaasaaqqanik utertitsisarneq: Brugseni Pisiffillu Naalakkersuisunit itigartitaapput
Nunatsinni pisiniarfiit pisiniarfippassuallit Brugseni aamma Pisiffik puiaasaaqqanik utertitsisarnermut atortussat nutaat ikkussussallugit ukiortaamut angumerisinnaannginnamikkit martsip naanerata tungaanut utertitsisarnermut tunngatillugu immikkut akuerisaallutik utaqqissussiniarnerigaluat Naalakkersuisunit itigartinneqarpoq innersuussutigineqarluni pisiniarfiit allat piareersimanerarsimanerat.
Nuuk imeq ukiortaamiit matusussanngornera unammillernartunik arlalissuarnik pilersitsinikuuvoq. Tamanna aamma atuuppoq puiaasaaqqanut utertittakkanut aaqqissuussinermut tunngatillugu.
Brugseni aamma Pisiffik Sulisitsisut peqatigiiffiat GE aqqutigalugu qinnuteqarnikuugaluarput pisiniarfimminni puiaasaaqqanik puukunillu allanik utertitsisarnermut aaqqissuussineq immikkut akuerineqarnikkut ukiortaamiit atuutilerani martsip naanerani imminnut aatsaat atuutilissasoq.
Tamannali Naalakkersuisut itigartippaat innersuussutigalugu pisiniarfiit allat puiaasaaqqanik puukunillu allanik tigoqqaasalernissaminnut piareersimanerarlutik nalunaarsimanerat:
- Qinnuteqaatip suliarinerani Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik utertitseriaatsimut nutaamut susassaqartut allat oqaloqatigisimavaat, taakkualu naatsorsuuteqarput 1. januar 2024 aallarnerfigalugu maskiinat imaluunniit assaat atorlugit aaqqiissuteqarnikkut piareersimasinnaassallutik, naalakkersuisoqarfik arfininngornermi 9. december tusagassiuutitigut nalunaaruteqarluni allappoq, naalakkersuisullu itigartitsinerat imatut tunngavilersorneqarpoq:
- Tamannalu tunuliaqutaralugu Naalakkersuisunit nalilerneqarpoq niuertarfiit utertitseriaatsip nutaap atuutsilerneqarnissaanut piareersarnissaminnut piffissaqarluarsimasut, taamaattumillu aamma periarfissaqartut qangatut utertitseriaaseq atornissaanut, puukunik utertitseriaasissap nutaajusup atornissaata tungaanut aaqqissuteqarnermikkut taamaammat immikkut ittumik akuersissummik qinnuteqaat itigartissutigineqarpoq.
Sulisitsisut GE-mit immikkut akuerineqarnissamik qinnuteqaammut atatillugu KNR-imut oqarput, Brugsenip Pisiffiullu pisiniarfippassuinut utertitsiviit ikkussornissaannu angumersisinnaatik, taamatuttaaq puiaasaaqqanik utertitsisarnermut malittarisassat utaqqeqqaartariaqarsimallugit malittarisassammi suussanersutnalullugit atortussanik pisiniaannarsinnaannginnamik ikkussuillutillu aallartiinnarsinnaannginnamik.