Puilasup ernganik isumaqatigiissut
Puilasup ernganik Qeqertarsuarmeersumik avammut tuniniaasalernissamik isumaqatigiissut marlunngorpat naalakkersuisut Greenland Spring Waterillu atsioqatigiissutigissavaat.
Greenland Spring Water Aps.-ip akuersissutit suut tamaasa maanna pigereerpai puilasullu ernga puiaasamiittoq nunatsinneersoq qanittukkut nunarsuarmi tuniniaavinni tuniniarneqartalissaaq, taamatut nalunaaruteqarpoq Inuussutissarsiornermut Sulisartoqarnermullu naalakkersuisoq Siverth K. Heilmann. Taassuma marlunngorpat isumaqatigiissut, puilasup ernganik nunatsinneersumik nunarsuarmi tuniniaavinni tuniniaasitsilersussaq, atsiussavaa.
Greenland Spring Water ApS 2006-imi martsimi puilasup ernganik Lyngmarkskildenimeersumik atuinissamut avammullu tuniniaanissamut akuersissummik tunineqarpoq. Tamatuma kingorna ingerlatsivik ukiunik pingasunik piffissalerneqarpoq aningaasarsiornissamut periarfissanik misissuinissaminut, avammut tuniniaanerup aallartivinnginnerani. Misissuinerit tamakkua takutissimavaat kalaallit imermik tunisassiaat nunani tamalaani tuniniaavissaqartut. Taamaattumik Inuussutissarsiornermut Sulisartoqarnermullu naalakkersuisoqarfiup 2008-mi augustimiilli Greenland Spring Water ApS isumaqatigiinniarfigisimavaa puilasup ernganik tunisassiornerup aallartinnissaanut piumasaqaatinik kingullernik, tamatumani ilanngullugu atuinissamut akuersissummut akitsuutip isumaqatigiissutigineqarnera.
Siverth K. Heilmann naapertorlugu Greenland Spring Water ApS-ip avammut tuniniaanermik aallartitsinera inuiaqatigiinnut tamanut pitsaasuusoq, tamatumuunakkut avammut tuniniaanerit allat peqatigalugit tunisat pisiallu oqimaaqatigiinnerat pitsaanerulissammat. Tamatuma saniatigut akitsuutinik isumaqatigiissut immikkut Landskarsimut isertitaqartitsissaaq, ingerlatsiviup tunisassiulerneranit ullormit siullermit. Tamanna peqatigalugu puilasup ernganik tunisassiorneq Qeqertarsuarmi suliffinnik nutaanik pilersitsissaaq. Greenland Spring Water ApS-ip naatsorsuutigaa suleqatigiinnik nikerartunik marlunnik aallartissalluni, piffissarli ungasinnerusoq isigalugu suleqatigiit nikerartunut pingasunut amerlineqarsinnaallutik.