Timmisartortitseqatigiiffik Air Greenland Kangerlussuarmut ataasinngormat 19-eriarluni mippoq: Dash-8-t 18-it nunap iluani timmisartuussisut taavalu Airbus Københavnimit. Timmisartoq siulleq nalunaaqutaq 8.00 mippoq, kingullerlu nalunaaqutaq 20.15 milluni. Sapaatip akunnerani ulluni allani timmisartut Islandimeersut, Europamiit Amerikamiillu takornarianik ilaasullit mittarput.
Sisamanngornermili novembarip 28-ani timmisartuussisarnerit allanngorluinnassapput, tassa Air Greenlandip Kangerlussuarmiit Nuummut timmisartuussisarnini aallartippagu.
Timmisartortitseqatigiiffik Air Greenland Kangerlussuarmut ataasinngormat 19-eriarluni mippoq: Dash-8-t 18-it nunap iluani timmisartuussisut taavalu Airbus Københavnimit. Timmisartoq siulleq nalunaaqutaq 8.00 mippoq, kingullerlu nalunaaqutaq 20.15 milluni. Sapaatip akunnerani ulluni allani timmisartut Islandimeersut, Europamiit Amerikamiillu takornarianik ilaasullit mittarput.
Sisamanngornermili novembarip 28-ani timmisartuussisarnerit allanngorluinnassapput, tassa Air Greenlandip Kangerlussuarmiit Nuummut timmisartuussisarnini aallartippagu.
– Nuummi mittarfik ammarneqarpat Air Greenlandip Kangerlussuarmut timmisartuussisarnera qanoq pissava?
– Ukioq kaajallallugu nunap iluani Nuuk – Kangerlussuaq – Sisimiut – Kangerlussuaq – Nuuk ataasinngornermi, pingasunngornermi tallimanngornermilu timmisartuussisarpugut, Air Greenland Sermitsiamut akissuteqarluni ilisimatitsivoq.
Air Greenland takornarialerisorlu Albatros Arctic Circle sapaatip akunneranut marloriarlutik Københavnimiit - Kangerlussuarmut - Nuummut - Kangerlussuarmut - Københavnimullu timmisartuussinissamik isumaqatigiissuteqarput.
Nunanit tamalaanit timmisartuussisarnerup allanngornerata kingunerisaanik Air Greenland Kangerlussuarmit - Ilulissanut - Kangerlussuarmullu sapaatip akunneranut arfinileriarluni marsip qulinganiit oktobarip naaneranut timmisartuussisalissaaq.
Billitsit tamarmik pisiassaalereerput
– Nuummi silarlussagaluarpat Air Greenlandip timmisartorsuarmik mittarfik sorleq atorsinnaavaa?
– Nunami timmisartuussinermut atatillugu Kangerlussuaq mittarfittut atorneqassaaq. Atlantikoq qulaallugu timmisartuussinermut atatillugu Kangerlussuaq atorneqassanersoq ullormi pissutsit aalajangiisuussapput. Pissutsit apeqqutaapput; Nuummi silarlussasoq siumut ilisimagutsigu Københavnimit aallarnissarput kinguartissavarput. Nuummut ingerlaarnitsinni ilimaginngisatsitut silarlussagaluarpat, ullulli ingerlanerani aaqqiiminissaa ilimanarpat Kangerlussuarmut missinnaavugut. Tamatuma kingorna ullup ingerlanerani Kangerlussuarmiit Nuummut timmisartuussissaagut, ullormilu tassani Nuummiit Københavnimut utissalluta, Air Greenland ilisimatitsivoq.
Timmisartut tamarmik tikilluaqquneqarput
Umiarsuit takornariartaatit Kangerlussuaq ’nuunnertut’ atortarpaat, umiarsuup tassani kisaqqanerani ilaasut inuttallu taarserneqartarlutik.
– Ukioq manna timmisartut attartorneqartut 57-it umiarsuarnik takornariartaatinik ilaasoqarlutik Kangerlussuarmut mippoq, sulili naluarput umiarsuarnik takornariartaatinik ingerlatseqatigiiffiit Kangerlussuaq atuunnassaneraat imaluunniit 2025-mi Nuummut taarsiiartortassanersut, Mittarfeqarfiit - Greenland Airportsimi pisortaq Henrik Estrup Sermitsiamut oqarpoq.
Kalaallit Nunaata Danmarkillu illersornissamut ministereqarfiata isumaqatigiissuteqarnerisa kingunerisaannik timmisartut tamarmik Kangerlussuarmut missinnaanerat periarfissaaginnassaaq.
– Kangerlussuup siunissami atorneqaannarsinnaaneranik isumaqatigiissut eqqissititsivoq. Kangerlussuullu mittarfia, mittarfiit allat assigalugit, ineriartortinnissaanut pisussaaffipput eqqortissavarput, Henrik Estrup oqarpoq.
Kangerlussuup nunanit tamalaanit mittarfittut atorneqaannarnissaa, Nuummi mittarfittaaq atornagu, isornartorsiorneqarpoq.
– Danskit illersornissaqarfiata isumaqatigiissutaa pissutaalluni timmisartut tamarmik mittarfiup atornissaanut periarfissaqalerpata timmisartortitseqatigiiffinnut Kangerlussuarmut mikkumasunut itigartinnissaat uagut suliassarinngilarput, Henrik Estrup oqarpoq.
Oqaatsip »atlantikoq qulaallugu timmisartuussineq« nalorninermik nassataqarunarpoq.
– Atlantikoq qulaallugu timmisartuussisarnermik oqartarneq paattoortitsigunarpoq. Air Greenlandip atlantikoq qulaallugu timmisartuussisarnera Nuummut nuussaaq, timmisartuussileqatigiiffiilli nunanit tamalaaneersut Kangerlussuarmut suli timmisartuussisinnaapput, Henrik Estrup oqarpoq.
Kangerlussuaq suli angallaviussaaq
Nuna tamakkerlugu innaallagissamik pilersuinermik ingerlatsivik Nukissiorfiit nunaqarfimmi mittarfissuaqarfiusumi pingaarutilimmik inissisimaffeqarput.
– Nukissiorfiit novembarip 28-ata kingorna Kangerlussuarmi siunissartik qanoq nalilerpaat?
– Nukissiorfiit illoqarfinni 17-ini inoqarfinnilu mikinerusuni 53-ini, aamma Kangerlussuarmi, pilersuisussaatitaapput. Taamaattumik Nukissiorfiit Kangerlussuarmiinnissaminnut pisussaaffeqarput; aamma innuttaasut ikilissagaluarpataluunniit, ingerlatseqatigiiffik Sermitsiamut akissutimini allappoq.
– Innaallagissamik, imermik kiassarnermullu atuinerup annikinnerulernera inuiaat ikiliartornerannut qanoq sunniuteqassava?
– Soorunami innuttaasut ikiliartornerat tunisinermut taamalu innaallagissamik, imermik kiassarnermillu tunisassiornermut sunniuteqassaaq, tunisassiornermulli innuttaasullu amerlassusiannut aamma aalajangiisuussaaq Kangerlussuarmi sunik allanik suliaqartoqassanersoq, soorlu takornariaqarneq, ilisimatusarneq illersornissaqarnerlu eqqarsaatigalugit.
– Nukissiorfiit sumiiffinni tamani sulisut amerlassusaat tunisassiornerup atuinerullu annertussusaat pisariunerallu tunngavigalugit aalajangersarneqartarput, tunisat nioqqutissiornerlu aallaaviginagit. Kangerlussuarmi sulisut maannakkut tunisassiornermut pilersuinermullu naleqqussarneqarnikuupput, nalilersorneqartuartarlutillu nalimmassarneqartarput.
– Kangerlussuarmi taarsersuinissamut aserfallatsaaliuinermullu pilersaarutit nalilersorneqartarput pisariaqartitsinermut Nukissiorfiillu aningaasaqarneranut tunngatillugu, pilersuinermik ingerlatseqatigiiffik ilisimatitsivoq.
