Puisinniartartut: Pinianngikkutta perlissaagut
Puisit amiinik nioqquteqarneq inerteqqutigilertinnagu nammineq illunni saneqqaarit, KNAPK-p pisortaata EU-mut nalunaarutaa taamaappoq.
EU-kommissionip pingasunngormat puisip amiinik tunisassianik inerteqquteqalernissamut siunnersuuteqareersorlu piniartut siunissaminnut ernumapput.
- Europamiut uagutsinnut isornartorsiuilertinnatik namminneq illuminni saneqqaartariaqarput. EU-mi allaffimminnut ingillutik suut tamaasa ilisimallugit isumaqarput, kisianni kukkukuuaraasivii puulukiisiviilu uumasunik naalliutsitsiviinnaviupput. Ukiuni hundrelikkaani piniarnermik inussuutissarsiortuuvugut, neqaa nerisarparput uumaannarsinnaajumalluta, piniartut sungiussilluarsimasuupput inuppalaartumillu toqutsisarlutik, taamak KNAPK-p piosrtaa John Biilmann uumitsassimaqisoq Jyllands-Postenimut oqarpoq.
Sumiiffiit ilaanni puisit ukiiuunerani qassutinik pisarineqartarput, periaaserlu taanna inuppalaannginnerarlugu isorineqartarpoq.
Qassutit sikup ataatigut siaarneqartarput, puisi iltissaarulluni ipinngikkuni qiminneqartarpoq.
- Kalaallit Nunaata avannaani piniartut imminerminnut, ilaquttaminnut qimmiminnullu nerisassaqartitsivissatuaraat. Namminneq, ilaqutaat qimmiilu kaalerpata allatut nerisassarsisinnaanngillat. Sikumi minus 45 gradenik issitsigisumi sulineq ilungersunartorujussuuvoq, John Biilmanni illersuilluni taamak aviisimut oqarpoq.
EU-mi siunnersuummi siunnersuutigineqartumi siunertaavoq, puisinik piniarnermi uumasut toqunneqarneranni ameerneqarnerannilu pitsaanerpaamik pineqarnissaat.
EU-kommissionip puisip amiinik tunisassianik niuersinnaaneq akuerisinnaavaa, piniarnermi periaatsitsigut uumasut pitsaanerpaamik pineqarnissaannik ileqqoreqqusaasunut naapertuunnerat qularnaarneqarsinnaappat.
EU-kommissionip siunnersuutaa EU-Parlamentimi Ministerrådianilu oqaluuserineqartussaavoq.