Puisit amii pillugit eqqissiviilliortoqartoq
Puisit amiisa tunisinermi akiisa isumaqatiginninniutigineqarnerat suli naammassinngilaq. Siumut isumaqarpoq KNAPK-ip isumaqatiginninniarneq suli naammassisimanngimmagu piniarneq sumiginnarneqartoq. KNAPK-li isumaqarpoq Naalakkersuisut ajornartorsiummut aaqqiinissamut matuersaat paarigaat.
Piniartut maannakkorpiaq puisit amiinik tunisisinnaanngillat, puisit amiisa tunineranut akigititaasussat suli isumaqatigiissutigineqarsimanngimmata. Piniartut sumiginnarneqarput, taamaattumik KNAPK Great Greenlandillu maannakkorpiaq isumaqatiginninniarnerit aallartittariaqaraat Siumut isumaqarpoq.
Naalakkersuisut matuersaat paarigaat
KNAPK-lli arsat Inuussutissarsiornermut Naalakkersuisumut milorujuppaa.
- Inuussutissarsiornermut Naalakkersuisoqarfiup matuersaat paarivaa. Uagut isumaqatiginninniarnermik aqutsisuunngilagut, kisianni kissaatigut novembarip sisamaanili apuutereernikuuagut, Vittus Qujaukitsoq, KNAPK-mi pisortaq oqarpoq.
- Piniartunulli taamaallaat ameerniarnermik isumalluuteqartunut KNAPK-p suliassaminik naammassisaqarsinnaasimanngitsutut inissisimarpalunnera kiisami akuerineqarsinnaanngilluinnartoq isumaqarpunga, Lars Poulsen Siumumeersoq tusagassiuutinut taama isornartorsiuilluni allappoq.
Suliassagut suliaraagut
KNAPK isumaqarpoq suliassatik suliaralugit.
- Uagut tungitsinniit puisit amii pillugit novembari aallartittoq naalakkersuisunut akit tunisinermilu tapinut tunngatillugu, tunisinermilu ilitsersuutit pillugit, tunitsiviillu aaqqiissuteqarfiginissaat siunertaralugu naalakkersuisunut allakkatigut saaffiginnissuteqarnikuuvugut. Taassuma qaavatigut puisit amii pillugit akit ineriartornerannik nassuiaammik aamma suliaqarnikuuvugut. Taamaammat uagut tungitsinniit uninngaannanngilagut, Vittus Qujaukitsoq Sermitsiaq.AG-mut oqarpoq.
Taassuma ilanngullugu oqaatigaa Inuussutissarsiornermut Naalakkersuisoqarfik aaqqiissutissanik suliaqartoq, naatsorsuutigalugulu uterfigineqassallutik.
- Atsioqatigiittoqassappat KNAPK-p peqataaffigisaanik aamma uagut piumasaqaatigut arlaatigut naaperiutigineqartariaqarput, naggasiilluni oqarpoq.
Sermitsiaq.AG Siumumiit kiisalu Inuussutissarsiornermut Naalakkersuisoqarfimmit oqaaseqartitsinissani sulissutigaa.