Puukunik utertitsisarneq: Imerpalasunut puukut assigiinngitsut 200-it sinnerlugit utertinneqarsinnaalissapput
Nunatta eqqagassalerinermut ingerlatsivia ESANI, maanna ulapputiginnippoq puiaasanik utertitsisarneq nutaaq ukiumi nutaamiit atuutilertinnagu suliassat kingulliit piareerniarlugit. - Puukut assigiinngitsut 200-it sinnerlugit amerlassusillit utertinneqarsinnaalissapput, taakkulu atoqqitassatut Danmarkimut nassiunneqartassapput,
Maannamut sungiusimavarput puiaasat assigiinngitsut pingasut utertinneqarsinnaasut, tassalu sodavandip "anginerup" 1/2 literimik imaqarsinnaasup puua plastikkeq, sodavandip mikinerup 25. cl.-mik imaqarsinnaasup puua igalaamineq aammalu immiaaqqap puua 33. cl-mik imaqarsinnaasoq igalaamineq, taakku utertikkaangatsigit aningaasat 2 koruunit pissarsiarisarpagut, sungiussassarpulli nutaaq tassaavoq puukut assigiinngitsut 200-it sinnerlugit amerlassusillit, igalaamerngit, plastikkit aammalu savimerngit utertittalertuttanngoratsigit.
Puukunik utertitsisarnermik aaqqissuussaaneq nutaaq atulerpat, puukut utertittagassat titarnernik kisitsisitalinnik (stregkoder) ilisarnaasersugaassapput sumiiffinnilu automateqarfiunngitsuniikkaanni utertitsisarneq puussianut immikkut naleqqussakkanut aammalu QR-kodelikkanut issorarlugit utertinneqartassapput:
- Aaqqissuussaaneq nutaaq piareerparput, taamaalilluta ukiortaamiit puukunik utertitsisariaaseqalernissarput piareersimaffigaarput aamma utertitat qanoq utertinneqareerneriniit qanoq suliarineqartarnissaat aamma piareereerparput. Sumiiffinni utertitsisarfinnik automatilinni puukut titarnernik kisitsisitalinnik pilersugaassapput, utertitsisarnermillu aaqqissuussinermut puukut ilanngunneqarsimappata, taava utertinneqarsinnaassapput. Sumiiffinni automateqarfiunngitsuni puussiat immikkut naleqqussakkat QR-kodellit atorneqassapput, taamaalillutik pisiniarfiit puukunik utertitsiffigineqartarnissaat aamma piareersimaffigineqarpoq, ESANI-mi pisortaq Frank Rasmussen Sermitsiaq.AG-mut oqaluttuarpoq.
Utertitsarnerup allangortinneqarnissaanut tunngatillugu Frank Rasmussen erseqqissaavoq pisiniarfiit namminneq aalajangigassarigaat utertittakkanik puullit suut nioqqutiginiarnerlugit, taamaammallu utertittakkat piffissap ingerlanerani nikerarsinnaapput, taamaattorli tamanut atuuttussaavoq imeruersaatit immiaaqqallu puui pillugit nalunaarut tamanit malinneqartussaammat.
Puussiat angissusaat assigiinngitsut utertitat annertussusaannik ersersitsisassapput
Utertitsisarnermut periutsit assigiinngitsut marluk atorneqassapput, siulleq tassaavoq "tamakkiisumik imminut isumagisartoq", tassa automatit pisiniarfinnut ikkussorneqarsimasut aqqutigalugit utertitsisoqartassaaq, taannalu illoqarfinni amerlanerpaani atorneqassaaq:
- Assersuutigiinnarlugu Tasiilami utertitsisalernissaq taasinnaavarput, Tasiilami ukiorpassuarni innuttaasut Nuuk Imerup utertitsisariaasianut ilaatinneqarnikuunngillat, maannali pisiniartartut periarfissaqalerput puukunik utertitsisinnaanissaminnut.
Aaqqissuussap aappaa tassaavoq sumiiffinni automateqarfiunngitsuni utertitsisarnissaq, periuseq taanna nunaqarfinni amerlasuuni ilisimaneqarpoq, tassa pisiniarfimmukarluni utertitsisarneq pisiniarfimmilu sulisup utertitat isumagisarpai. Tassunga tunngatillugu pisiniarfiit puussianik utertitsisarnermut naleqqussakkanik pilersorneqassapput taakkulu assigiinngitsunik angissuseqassapput, taamaalilluni puussiap imarisai utertitat qanoq amerlatiginersut missiliorneqarsinnaavoq, taakkulu puussiat QR-kodeqartinneqassapput.
- Aaqqissuussaaneq sorliugaluarpalluunniit atorneqartoq, uagut suliassaraarput puukut utertitat katersussallugit aammalu qulakkiissallugu nalunaarutigineqarsimasutut ilumut amerlassuseqartut, puukullu utertinneqarsimasut katersorneqareeraangamik Danmarkimut nassiunneqartassapput, tassani utertitsisarnermik suliaqarlutik suliffeqarfiit suleqatigisassagut puukut atoqqitassanngorlugit suliarineqarnissaannik isumaginnittassapput.
Aaqqissuussaanerup teknoligimut tunngasortaanik Magenta suliaqassaaq
Aaqqissuussaaneq atortorissaarutitigut isumagineqarsinnaaqqullugu utertitsisarnerlu ataavartumik ineriartorsinnaaqqullugu periutsit assigiinngitsut marluk aqqusaarneqartussaapput, tassalu utertitassat nalinganut akiliisitsineq, taanna pisassaaq Kalaallit Nunatsinnut eqqussuisarnermi, taavalu tamatuma kingorna pisisartut atuereernermik kingorna utertitsigaangata suliffeqarfinnut nalinganik aningaasanik utertitsisarneq (pisiniarfiit, kioskit, neriniartarfiit ilaallu ilanngullugit).
Utertitsisarnermut periutsip nutaap qarasaasiatigut suliassartai ineriartortitsinertaalu suliffeqarfiup Magentap isumagissavaa. Suliffeqarfik taanna Københavnimi, Aarhusimi Nuummilu immikkoortortaqarfeqarpoq.
Akileraartarnermut aqutsisoqarfik nioqqutissanik nunatsinnut eqqussuussinermi imeruersaatinut utertitakkanut utertinneqarnissaannut qularnaveeqqummik akiliisitsisarneq isumagissavaa, ESANI A/S-ip utertitat katersorneqarnissaat isumagissavaat aammalu utertisisoqareernerani utertitat nalingi pisiniarfeqarfinnut utertinneqarnissaat isumagissallugu. Magenta Grønland-ip ESANI-mut akileraartarnermullu aqutsisoqarfimmut qarasaasiatigut aaqqiissutit isumagissavai.
Akileraartarnermut aqutsisoqarfiup akitsuusiisarnermut tunngasortaa aamma isumagissavaa, aaqqissuussaanerlu taanna Magentap ineriartortippaa. Taamaalilluni pisisartunut utertitsisariaaseq nutaaq pisariitsumik atorneqarsinnaanera isumannaarniagaavoq.