Puukunik utertitsisarneq: Tasiilaq utertitsivittaareerpoq
Pilersuisup pisiniarfippassuini Tasiilami pisiniarfiit marluk puukunik utertitsivittaaqqaartuupput. Nunap immikkoortuani pisortaq Martha Mikaelsen naammagisimaarinnilluarpoq, ukiortaamiimmi puukut assigiinngitsut 40-nit amerlanerusut utertinneqarsinnaalertussaapput.
Nunatsinni pisiniarfiit pisiniarfeqarfissuillu ilaanni aaqqissuussaaneq nutaaq unamminartortaqaraluarpoq. Tasiilamili Pileresuisup pisiniarfiisa ukiumi nutaamiit puukunik utertitsisarnerup allanngortinneqarnissaa piareersimaffigillualereerpaat.
Tassami Tasiilami Pilersuisup pisiniarfii Pilersuisup nunatsinni pisiniarfiinit tamanit siullersaalluni utertitsivissat nutaat tigoreerlugit pisiniarfinnut marluusinut ikkussorsimalereerpaat, taakkulu uukunut plastikkiusunut, igalaaminiusunut aammalu qillertuusanut utertitsiviussapput.
Pisinartunut pinngortitamullu iluaqutaassaaq
Pilersuisumi nunap immikkoortuani pisortaq aammalu Pilersuisup Tasiilami pisiniarfiini pisortaagallartoq, Martha Mikaelsen naammagisimaarinnilluarpoq ukiumi nutaamiit puukunik utertitsiveqalernissaq piareerneqarmat:
- Nikussutiinnarlugu oqaatigisinnaanngikkallarpara puukut assigiinngitsut qasserpiaat utertinneqartalerumaarnersut, taamaattorli maannamut oqaatigisinnaavara puukut assigiinngitsut 40-it sinnerlugit utertinneqarsinnaalertussaassammata. Puukut pisiniartutta siusinnerusukkut atoreeraangamikkit utertissinnaasarsimanngisaat.
- Tamanna isumalerujussuussaaq. tassami pisiniartartugut utertitsinermikkut aningaasanik utertitsissaliinnassanngillat, aammali minnerunngitsumik pinngortitamut iluaqutisseerujussuartussanngorpugut, Martha Sermitsiaq.AG-mut oqaluttuarpoq.
Tassunga tunngatillugu Martha Mikaelsen oqaluttuarpoq, pisiniartartut siusinnerusukkut puukunik utertitsisinnaasarsimannginnerisa kingunerisaanik puukut eqqaavissuarmut igitassanngunngikkaangamik pinngortitamut qimaannarneqarsimasut takussaasarnikuunerat maanna annikilleriarujussuartussanngortoq naatsorsuutigigini.