Puussiat plastikkiusut 2,8 miliuunit 2021-mi tunineqarsimasut
Brugseni, KNI Pisiffillu puussianik plastikkiusunik katillugit 2,8 miliuuninik 2021-mi tunisaqarsimapput. Puussiat plastikkiusut ikinnerusut tunineqartarnissaannik anguniagaqarluni akitsuutinik qaffaasoqarsimagaluartoq, anguniagaq suli ungasissupilussuarmiippasippoq.
Nunatta Karsiata 2021-mi puussianut tigummiartakkanut avatangiisinut akitsuutit aqqutigalugit pissarsiarisai 11,49 millioner koruuniusimasut. Inatsisartuni ilaasortap Pipaluk Lynge Rasmussenip (IA) paragraf 37 naapertorlugu apeqquteqarnermini ilaatigut paaserusussimavaa nunatta karsia akitsuut aqqutigalugu "qanoq isertitaqartigisimanersoq".
- Puussiamut plastikkimik sanaamut tigummiarfilimmut tunineqartumut ataatsimut avatangiisinut akitsuut 3 koruuniuvoq. Aningaasaqamermut Naligiissitaanermullu Naalakkersuisoqarfik ilisimatitsivoq, Nunatta Karsiata 2021-mi puussianut tigummiartakkanut avatangiisinut akitsuutit aqqutigalugit pissarsiarisai 11,49 millioner koruuniusimasut, Avatangiisinut Naalakkersuisoq Kalistat Lund akissuteqarluni allappoq.
Kalistat Lund Brugsenimu, KNI-mut Pisiffimmullu paasissutissanik pissarsiniarsimavoq, tassanilu paasisimallugu pisiniarfiit pingasuutut taakku puussianik plastikkiusunik 2,8 miliuusunik 2021-mi tunisaqarsimasut.
Puussiaq 6 koruunilik
2019-imi novembarip qaammataani Naalakkersuisuusut puussianut plastikkiusunut avatangiisinut akitsuut atuutsilerpaat. Taamanikkut naalakkersuisuusut ilaatigut sukkut, mamakujuttut, imigassaq, cigaretsit, tupat piseqqusaarutitullu naqitat akitsuutaat qaffappaat.
Nutaamik akitsuusiinikkut naatsorsuutigineqarsimavoq, puussiat plastikkiusut ukiumut tunineqartartut 1,75-2,5 miliuunit missaannut ikilisinneqassasut. Tamanna anguneqarsimasuuppat puussiat plastikkiusut tunineqartartut affaannanngorsimassagaluarput. Taamatulli ingerlalluartigisoqarsimanngilaq.
Pisiniarfiit 2020-mi ukiakkut ilisimatitsissutigaat, puussianik plastikkiusunik pisiaqartoqartarnerata allanngorsimanera malugisinnaasimanagu, ukiumi pineqartumi tunineqarsimasut 12 procentiinnarmik apparsimammata.
KNI-mit ilisimatitsissutigineqarpoq, puussiat 37 procentii isertitsissutigisarlugit. Tassa puussiaq ataaseq 2,43 koruuninik isertitsissutigisarlugu. Pisiniarfinni assigiinngitsuni puussiaq ataaseq 6 koruunit missaannik akeqarpoq.