Qaanaaq: Aqqusineq nutaaq qaammatip ataatsip ingerlanerani pilersinneqartoq
Najukkami sanaartugassanik suliaqartartoq aqqusinermik illoqarfiup aamma Qaanaap mittarfiata akornanni utaqqiisaa atorneqartussamik qaammat ataaseq sinnilaarlugu suliaqarpoq. Aaqqiissut aasap tulliata tungaanut atasinnaavoq.
Qaanaami sanaartugassanik suliaqartartut illoqarfiup mittarfiullu akornanni aqqutaagallartussamik sanaartorlutik naammassipput, angalasut taamaalillutik mittarfiliarlutillu tassanngaanniit ingerlasinnaanngorput. Suliaqarneq qaammatip ataatsip missaanik ingerlanneqarpoq, aqqutaagallartussarlu aasap tullianut atasinnaasoq naatsorsuutigineqarpoq, tassanilu aaqqiissummik atajuartussamik suliaqartoqassaaq.
Attaveqaasersuutinut naalakkersuisoqarfik tusagassiuutinut nalunaarummi taama ilisimatitsivoq.
- Qaanaami najukkami entreprenøri, sukkasuumik nutaaliorlunilu illoqarfiup mittarfiullu akornanni nutaamik aqqusinniorluni iluatsittumik suliarinnittoq, qutsavigerujussuarparput. Aqqusineq nutaaq taanna Qaanaami innuttaasunut pingaaruteqartorujussuuvoq aammalu inaarutaasumik aqqusinniortoqarsinnaalernissaata tungaanut taakkua mittarfimmukarsinnaanissaat mittarfimminngaanniillu aqqutissaqarsinnaanissaat qulakkeertussaallugu, ineqarnermut attaveqaasersuutinullu naalakkersuisoq, Hans Peter Poulsen (S) oqarpoq.
Annertuumik ajoqusernerit aqqusineq matutikkaat
Qaanaap illoqarfiata aamma mittarfiup akornanni aqqusineq annertoorujussuarnik ajoquteqalersimasoq, pingasunngorneq ulloq 23. august 2023 tusagassiuutini nalunaarutigineqarpoq. Ineqarnermut Attaveqaasersuutinullu Naalakkersuisoqarfik, Air Greenland A/S, Mittarfeqarfiit A/S aamma Avannaata Kommunia ataatsimeeqatigiipput.
- Immikkoortup aappaa maannakkut naammassineqareerpoq aammalu illoqarfimmi najukkami sanaartugassanik suliassinneqartartup atortussat illoqarfimmi uninngasuutigineqartut atorlugit Qaanaap illoqarfiata mittarfiullu akornanni aqqusinniorneq iluatsittumik suliaraa, naalakkersuisoqarfik allappoq.
Aasap tulliani aqqusineq atajuartussaq sanaartorneqassasoq naatsorsuutigineqarpoq, attaveqaasersuutinut naalakkersuisoqarfiup aappaagu aasap tungaanut ataavartussamik aaqqiissuteqarnissamut sukumiisunik paasissutissiiumaarpoq.