Qajaq hyperkinetiskiusoq Århusimi
Saqqummersitsinermi "Rethink Information" (Paasissutissaq eqqarsaatigeqqillugu aaq.) taaneqartumi, qajaq eqqumiitsuliaq silarsuarmi sikuinnaasumi 3D-nngorlugu takutitassiaasoq saqqummersinneqassaaq, sila pillugu decembarimi Københavnimi ataatsimersuarnissap nalaani.
Ukiut pingasut matuma siorna danskip eqqumiitsuliortup Jette Gejl, 'Hyperkinetic Kayak' Narsami suliaralugu aallartippaa. Siku, silaannaq imerlu pillugit paasissutissanik uppernarsaatissanillu katersivoq assiliilluni nipinillu immiussilluni, taakku tunngavigalugit 3D-nngorlugu suliaq pilersippaa, 2008-mi aasami Narsap Katersugaasiviani saqqummersillugu, saqqummersitsineq taanna ukioq manna Kalaallit Nunaanni katersugaasivinni angalaarpoq.
Eqqumiitsuliaq sila pissusaata Københavnimi ataatsimeersussutigineqarnissaani eqqumiitsulianik takuniaaffissanik neqeroorutini ilaavoq. Ilaatigut, newsealandimiup qarasaasiatigut atortorissaarutit atorlugit eqqumiitsuliortartup Janine Randersonip suliaasa takuneqarsinnaaneri ”Rethink Information” aamma neqeroorutigai. Eqqumiitsuliat tamarmik issittumit paasissutissartaqarput takusaasunit issittumik takorluuilersitsisussanik.
Eqqumiitsuliatut allatulli pitsaalluinnaraangami alagallagassaanngilaq qiviaqqajaanarlunilu tamatumalu saniatigut paasisaqarnarnerulaarluni, Rie Oldenburg Narsap Katersugaasiviata pisortaa oqaluttuarpoq.
Suliat maannakkut Århusip eqqaaniittumi Moesgaard Museumimi saqqummersinneqarput. Katersugaasiviup novembarip decembarillu qaammataanni issittoq immikkut sammivaa, alakkaasullu periarfissillugit issittoq pillugu isummaminnik paasisimasaminnillu oqaaseqaateqarnissaannut.
Suliniutip Rething Informationip ataanniippoq Rethink – Contemporary Art and Climate Change (Eqqarsaatigeqqillugu – Ullutsinni Eqqumiitsuliorneq aamma Silap pissusaata allanngoriartornera aaq.).
Saqqummersitsineq taanna Nunat Avannarliit kulturikkut aningaasaateqarfianit ”Nunani Avannarlerni Saqqummersitsineq 2009 - 2010” toqqarneqaqqammerpoq.
Hyperkinese isumaqarpoq: Nukiit sulinerat nappaammik aallaaveqartumik sakkortuvaallartoq. Hyperkinetisk syndrom tassaasoq ingasattumik pissusilik aammalu avatangiisit isiginngitsutut illugit periuseqartarneq