QAK-ip siunnersuisarfik KNAPK-miit tiguaa
Qalerualinniat aalisagarniallu kattuffiat, QAK, aalisarnermut piniarnermullu siunnesorteqarfiup ingerlanneranut akisussaasussatut suliariumannittussarsiornermi ajugaavoq, Konfifamillu ingerlatsineq 1. juli aallarnerfigalugu tiguaa.
KNAPK-p siunnersorteqarfik Konfifap ingerlanneqarnera tigummiunnaarpaa.
Qalerualinniat aalisagarniallu kattuffiat, QAK, siunnersorteqarfiup ingerlanneqarneranik ullumikkumiit 1. juli tigumminnittunngorpoq.
Aalisarnermut piniarnermullu naalakkersuisoqarfik tallimanngornermi ualikkut tusagassiorfinnut nalunaaruteqarluni taama allappoq.
- Suliariumannittussarsiuussereernerup kingorna, QAK toqqarneqarsimavoq, piniartunik sinerissallu qanittuani aalisartunik siunnersuisarfik ingerlatissagaa. Suliariumannittussarsiuussineq inatsit tassunga tunngasoq malillugu ingerlanneqarpoq, naalakkersuisoqarfik allappoq.
QAK-p siulittaasua Henrik Sandgreen, KNAPK-mi siulittaasuusimanini tunngavigalugu, Konfifap ingerlanneqarneranik ilisimasaqareerpoq.
Sivitsortumik noqqoruussutaasoq
Siunnersorteqarfiup ingerlanneqarnera KNAPK-p ukioq 2023 aallartinneraniit tigummiunnaassagaa Naalakkersuisut pilersaarutigereernikuuaat. KNAPK siunnersuisarfik ukiuni 18-ini ingerlassimavaa. Pilersaarutaagaluarpoq siunnersorteqarfik KNAPK-miikkunnaarluni arlaannaanulluunniit attuumassuteqanngitsumit ingerlanneqassasoq, taamali pilersaaruteqarneq unitsinneqartoq kingorna nalunaarutigineqarsimavoq.
QAK-p Konfifa maanna ingerlattussanngorpaa. Konfifami siunertaavoq aalisarneq piniarnerlu pillugit siunnersuisarnikkut aalisarnermik piniarnermillu inuussutissarsiummi ataatsimut isigalugu piginnaanngorsarnissaq.
KNAPK-p siusinnerusukkut nalunaarutigereerpaa siunnersorteqarfiup ingerlanneqarnerata tigummiunnaarneranut atatillugu sulisunik marlunnik soraarsitsisariaqalernissamut aningaasartuutaasussat pillugit naalakkersuisoqarfimmut taarseeqqusinissamik piumasaqassalluni.
Konfifap ingerlanneqarnerata unitsikkiartuaarnera KNAPK-p qaammatini arfinilinni kingullerni ingerlassimavaa.