QAK-p siulittaasua Henrik Sandgreen: Aalisartut kattuffii politikikkut attuumassuteqanngitsuusariaqarput

Kalaallit Nunaanni aalisartut piniartullu kattuffiisa annersaanni, Kalaallit Nunaanni Aalisartut Piniartullu Kattuffianni, kattuffimmi pingaarutillit pingasut upernaaq Inatsisartunut qinigassanngortimmata, KNAPK-mi ilaasortat qisuariarput. Ilaatigut ilaasortat isumaqaramik toqqissisimanarnanilu naleqqutinngitsoq kattuffimmi siuttuusut partiimut aalajangersimasumut ilaasortaanerat, tamannalu ilaasortat aalisartullu akornanni avissaartuussutaasinnaasoq.

Taakku saniatigut aamma Sinerissap Qanittuani Aalisartut Piniartullu Kattuffianni, SQAPK-mi, Ilulissani qullersaqarfilimmi, pisortaq Inatsisartunut qinigassanngortippoq.

Politikikkut attuumassuteqanngitsut 

Aalisartut kattuffiisa politikikkut attuumassuteqannginnerat pingaaruteqarpoq, piffissami matumani aalisarnermut inatsit nutaaq ukiut nikinneranni atuutilersoq suli suliarineqarmat. Tamanna aalisarnermik inuussutissarsiuteqartut ataatsimoornissaasa pisariaqarneranik kinguneqarpoq, Henrik Sandgreen, Kalaallit Nunaanni aalisartut kattuffiisa pingajuanni, qalerualinniartut aalisartullu kattuffiata, Qalerualinniat Aalisagarniallu Kattuffiata, QAK-p, siulittaasua oqarpoq.

Henrik Sandgreenip KNAPK-mi ukiuni arfineq-pingasuni aamma siulittaasuusimasup oqaatigaa, partiimut aalajangersimasumut ilaasortaagaanni QAK-mi aqutsisutut akisussaaffeqartoqarsinnaanngitsoq, aamma Inatsisartunut imaluunniit folketingimut qinigassanngortinniaraanni kattuffimmit tunuartariaqarpoq.

Henrik Sandgreen, aamma ukiuni arfineq-pingasuni KNAPK-mi siulittaasuusimasoq, naapertorlugu partiimut aalajangersimasumut ilaasortaagaanni QAK-mi aqutsisutut akisussaaffeqartoqanngilaq, Inatsisartunullu Folketingimulluunniit qinigassanngortikkaanni kattuffimmi aqutsisunit tunuartariaqarpoq.

- Kattuffipput avataasiortunik, ilaatigut raajarniartunik ilaasortalik, inunnit politikikkut anguniagaqartunit attuumassuteqartunillu aqunneqarnissaa kissaatiginngilarput, oqarpoq.

Sulinermut sunniuteqarsinnaasut  

Peqatigiiffinni kattuffinnilu ukiuni kingullerni siuttuusut politikimut toqqaannartumik toqqaannanngitsumilluunniit attuumassuteqartut arlallit takuneqarsinnaasimasut oqaatigaa.

- Taama pisoqarnissaa pinngitsoortinniarlugu sapinngisamik aqutsisut siulersuisullu politikikkut attuumassuteqarnissaat killilersorsimavarput. Partiit kattuffinni siuttuusunut politikikkut attaveqarnertik aqqutigalugu kattuffiup sulineranut sunniuteqarsinnaasut nalunngilarput. Taamaalilluta QAK partiit politikikkut anguniagaannit aalajangersimasunit ilusilersorneqannginnissaa qulakkeerniarsaraarput, Henrik Sandgreen oqarpoq.

Sammisaq mianernartoq

Aalisarnermut tunngasunik suliaqartut tamarmik QAK-mik oqaloqateqarsinnaanissaannut inissaqartariaqartoq, Henrik Sandgreen erseqqissaavoq.

- Politikki aalisarnermut akulerutsinneqaraangat aalisarneq sammisatut mianernartorujussuanngortarpoq. Taamaattumik QAK-mi partiit arlaannaannulluunniit attuumassuteqannginnikkut aalisarneq pillugu isummat tamarmik inissaqartinneqassapput. KNAPK-mi siulittaasuuninni misilittakkakka naapertorlugit, kattuffimmi aqutsisut ilaat siulersuisunut ilaasortaasut imaluunniit allaffeqarfimmi atorfeqartut partiinut aalajangersimasunut attuumassuteqaraangata tamanna ajornartorsiornarsinnaasartoq.

- Ilaatigut misigisimatsitut aalisartoq piniartorluunniit ataaseq arlallilluunniit politikimik suliaqartut KNAPK-p ataatsimiititaliaani assigiinngitsuni ilaasortaasut, taamatullu pisoqaraangat aalajangiisinnaanermut apeqqusiisoqartartoq, tamannalu iliuuseqarfigisariaqartarparput. Taamaattumik assersuutissaqarpoq ilaasortat ilaasa partiimut aalajangersimasumut attuumassuteqartunik ilaasortaatitaqarneq apeqqusertarsimagaat, oqarpoq.

Henrik Sandgreen KNAPK-mi ukiaanerani 2021-mi siulittaasuujunnaarsinneqareersorlu QAK februaarimi 2022-mi pilersinneqarpoq.