Qalasersuup eqqaani sikoqanngilaq
Qallunaat ilisimasassarsiortut kalaallinik peqataasortallit umiatsiaaqqamik Qalasersuup eqqaani angalapput.
– Maani maannakkorpiaq uninngavigisatsinni imaani sikoqanngilaq. Mallit 2-3 meterinik portussuseqarput, taamaanneralu maani najugaqartuusut siornatigut takusimanngisaannarsimavaat. Imaappoq avatitsinni imartaq annertoorujussuaq sikoqanngitsoq. Russit silassiorfimmi pisortaasup taamak oqaluttuuppaatigut, qallunaat ingeniøri ilisimasassarsiortunilu pisortaasoq Anders Bilgram Ingeniørimut oqarpoq.
Ilisimasassarsiorneq »Polarpassage 2000« ateqartoq 2000-imiilli aggulutamik ingerlanneqartarsimavoq. Ilisimasassarsiornermi kalaallit peqataasut tassaapput Ole Jørgen Hammeken aamma Frederik Solberg Lynge.
– Ullut marluk siornagut nanoq qeqertami pilutanik qorsuusunik immaqalu narlumukaamik nerisoq takuarput. Tamakku nannut nerisarinngilaat, kisianni sikoqanngippat puisinniarsinnaanngilaq. Maani silasiorfimmi nannnut aamma takkuteriataartarput. Silasiorfimmi pisortaq qanittukkut nannunut marluusunut illut akornannut pisimasunut apungajalluinnarsimavoq. Nannut kaapput assullu ulorianarlutik. Aallaaseqartinnaga anisinnaanngilagut, Anders Bilgram oqarpoq.