Qaleralik ukioqqortuvoq
Ilisimatuussutsikkut paasiniaanerit takutippaat qaleralik 70 centimeterimik takissusilik siullermik ilimagisamiit ukiunik 20-nik amerlanerusunilluunniit ukioqqotunerusoq
Ilisimatuussutsikkut paasisassarsiortut aalisakkat siutaanni saanermi kigarnerit kisillugit qanoq ukioqarneri aalajangertarpaat. Taannali periuseq eqqortumik qanoq ukioqarnerinik aalajangiissutaasinnaanngitsoq, ilisimatuut nunanit tamaneersut oqaatigaat.
Ilisimatuup norgemiup Ole Thomas Albert-ip imaani ilisimatuussutsikkut paasisassarsiorfimmi atorfillip oqaatigaa, siutit saanertaani kigarnerit naapertorlugit ukiunik aalajangiiniartarneq imaannaanngitsuuvoq.
- Taamatut periuseqarluni qalerallit ukiui aalajangeruminaatsupilussuupput, sivisuumillu taanna periuseq naapertorlugu aalajangiisarneq qularnartoqartinneqartareerpoq, taanna FiskeriTidende-mut oqarpoq.
Aalisakkat qanoq ukioqarnerat paasiniarlugu arlalinnik periuseqartoqartarpoq.
Periutsit ilagaat, qalerallip kemiskimik kaperiarlugu avaleraatigut meqqileriarlugu avalatteqqittarnera. Taava pisarineqaqqikkaangat kapineqarfianiit kigarnikuusat kisillugit ukiui aalajangerneqartarput, qanga meqqilerlugu avalatteqqissimanera naapertorlugu.
Paasissutissat taakkua atorlugit takuneqarsinnaavoq, ilumut ukiut tamaasa kigarnerit nutaat takkuttarnersut.
Ilisimatuut ukunani nunaneersut suleqatigiillutik paasissutissat nutaat nassaaraat: Rusland, USA, Canada, Kalaallit Nunaat, Polen, Spania, Portugal kiisalu Norge.