Umiatsiaararsorlutik aalisartunut 6 meterit angullugit aalisariutilinnut aqutsivimmi 47-mi, tassa Qeqertarsuup Tunuani, Uummannami Upernavimmilu, qaleralinniarnissamut paggatassiissutiniit Pisassiissutinut Niuerutigineqarsinnaasunut Nammineq Pigisanut (PNNP) nuunnissamut qinnuteqarfissaq oktobarip 15-iani qaangiuppoq.
Aalisarnermut Piniarnermullu Naalakkersuisoqarfik qinnuteqaatinik katillugit 509-nik, tassa sumiiffimmi aalisartut 2023-mi katillugit 42 procentiisa annertussusaannik, tigusaqarput.
Umiatsiaararsorlutik aalisartunut 6 meterit angullugit aalisariutilinnut aqutsivimmi 47-mi, tassa Qeqertarsuup Tunuani, Uummannami Upernavimmilu, qaleralinniarnissamut paggatassiissutiniit Pisassiissutinut Niuerutigineqarsinnaasunut Nammineq Pigisanut (PNNP) nuunnissamut qinnuteqarfissaq oktobarip 15-iani qaangiuppoq.
Aalisarnermut Piniarnermullu Naalakkersuisoqarfik qinnuteqaatinik katillugit 509-nik, tassa sumiiffimmi aalisartut 2023-mi katillugit 42 procentiisa annertussusaannik, tigusaqarput.
Umiatsiaararsorlutik aalisartut amerliartuinnartut aalisarnermut inatsisitaamut januaarip aallaqqaataani atuutilersumut, atatillugu pisasseeriaatsimut PNNP-mut tapersersuinertik ilisimatitsissutigisaleraluaraat pissutsit ilisimaneqanngitsut arlaqarput. Tamanna aalisartorpassuarnut qununartumik sunniuteqarpoq, aalisartut piniartullu kattuffiini Kalaallit Nunaani Aalisartut Piniartullu Kattuffianni, KNAPK-mi, aamma Sinerissap Qanittuani Aalisartut Piniartullu Kattuffianni, SQAPK-mi isumaqarput.
Pisassiissutinik agguaaneq
Qinnuteqaatit 509-usut suliarineqarnerat aallartereerpoq, tinnuteqartullu piffissami tulliuttumi pisassiissutissatut missingersuutaasa naatsorsorneqarneri pillugit tusarniaaffigineqassapput. Pisassiissutissat ukiuni kingullerni tallimani 2019-imiit 2023 ilanngullugu ukiut aalisarfiulluarsimanerit pingasut tunngavigalugit naatsorneqarput.
Aalisarnermut Piniarnermullu Naalakkersuisoqarfik naapertorlugu aalisartup pisai aalisartut tamarmik aqutsiveqarfimmi 47-mi pisarisimasaannit annertunerpaani pingasuni pisarisimasaannit qanoq annertutigissanersoq naatsorsorneqassaaq. Aalisartorli ukiuni kingullerni tallimani ukiuni marluinnarni aalisarsimappat pisassiissutissai pisarisimasai najoqqutaralugit annikillineqassapput.
Aalisartumut umiatsiaararsortumut pisassiissutit tamakkiisut naatsorsorneqareerpata 2025-mut pisassiissutissat annertussusaat, TAC-mik, tassa pisassiissutissat annertunerpaaffissaannik, aamma taaneqartartoq naatsorsorneqarsinnaalissaaq, inunnullu ataasiakkaanut ukiup tullianut pisassiissutissatut missingersugaq qinnuteqartunut akissummi allassimassaaq.
Maalaaruteqarnissamut qaammat ataaseq piffissaliunneqartoq
Aalisartunut umiatsiaararsortunut PNNP tunniunneqartoq pisassiissutissat annertussusissaat aalajangiunneqartoq naapertorlugu ukiut tamaasa allanngorsinnaavoq, pisassiissutilli tunniunneqartut aalisartup pisassiissutinik tunisineratigut allalluunniit pisassiissutaanik pisineratigut taamaallaat allanngorsinnaavoq.
Qinnuteqartut tamarmik naatsorsukkanut maalaaruteqarnissaminnut qaammat ataaseq piffissalerlugit periarfissinneqassapput. Maalaarutinik novembarip 25-aatinnagu naalakkersuisoqarfimmut takkuttoqarsimanngippat, naatsorsukkat nassuiarneqartut atorneqassapput, qinnuteqaallu tunngavilersuutigineqartut malillugit suliarineqassaaq. Kingorna inaarutaasumik naatsorsuisoqassaaq qinnuteqartullu tamarmik pisassiissutiminnut akuersissummik 2025-milu pisassiissutit annertussusaannik nassinneqassapput. Aalisartut umiatsiaararsortut ukioq manna qinnuteqarnissaminnut angumersisimanngitsut aappaagu kingusinnerpaamik oktobarip 15-iat nallertinnagu qinnuteqarsinnaassapput, tassanilu 2026-mi januaarip aallaqqaataani PNNP-nut 2026-moortunut nuuttoqassaaq, Aalisarnermut Piniarnermullu Naalakkersuisoqarfik ilisimatitsivoq.
Tupaallaatiginngikkaa
KNAPK-mi siulittaasup Nikkulaat Jeremiassenip aqutsivimmi 47-mi aalisartut umiatsiaararsortut affaasa inorlugit PNNP-mut nuussallutik qinnuteqarsimanerat tupaallaatiginngilaa. PNNP-mut nuunnerisa suna kingunerisinnaagaa arlalinnit ilisimaneqanngitsoq pingaarnertut pissutaasoq taanna isumaqarpoq.
- Pisassiissutit annertussusaat ukiuni tallimani kingullerni ukiut pisaqarfiunerpaat pingasut naapertorlugit pisassiissutinik naatsorsuisarnissamik aalajangiineq pissutigalugu arlallit immaqa qinnuteqarsimanngillat. Aalisartummi ilaat qaleralinnik paggatassiissutinik pisaqarnerpaasartut ilisimavarput, PNNP-lu naapertorlugu aalisarnissaq toqqarunikku ukiumut tulaattagaat annertuumik annikillissapput, taanna oqarpoq.
Aalisartut PNNP naapertorlugu aalisalernissamut nuunniarlutik qinnuteqartut amerlanerpaartaat qaleralittassatik tamakkerunikkit aalisakkanik pissuseqatigiiaanik allanik soorlu saarullinnik aalisarnissaminnut aamma periarfissaqartuusut taassuma ilimagaa.
Atugassarititaasut pitsaanerusut
Aalisarnermut inatsisitaaq PNNP naapertorlugu umiatsiaararsorlutik aalisartut atugassarititaannut pitsanngorsaataassasoq Anthon Lindenhann, SQAPK-mi, Ilulissani qullersaqarfeqartumi, siulittaasuusoq isumaqarpoq.
- Umiatsiaararsorlutik aalisartut pisasseeriaatsimut PNNP-mut nuussinnaanerat amerlanerniit tapersersorneqartoq ilisimavarput, taamaammallu aalisartut 42 procentiinnaasa qinnuteqarsimanerat tupaallaatigilaarpara, tamatumali aalisartunut umiatsiaararsortunut qanorpiaq kinguneqarsinnaanerata suli iluamik ilisimasaqarfiginnginneranik pissuteqarsinnaavoq.
- Aalisartut umiatsiaararsortut aningaaserivimmi taarsigassarsisinnaanerat ukiuni kingullerni ajornakusuungaatsiarnikuuvoq, inatsimmilu nutaami umiatsiaararsorlutik aalisartut PNNP naapertorlugu pisassinneqartarnerat aalisartut umiatsiaararsortut aningaaserivimmi taarsigassarsiniarnerannut qularnaveeqqutitut atorneqarsinnaanera aalisartunit umiatsiaararsortunit tigulluarneqarneranut pingaarnertut pissutaavoq, taanna oqarpoq.
Aalisariutinik nutarsaaneq
Aalisarnermut inatsisitaaq aqutsivimmi 47-mi sinerissap qanittuani aalisariutit nutarsarneqarnissaannut aqqutissiuissasoq SQAPK-mi siulittaasoq isumaqarpoq, taamatuttaarlu aalisartut amerlanerusut siunissami qaninnerusumi aalisariutinik 6 meteriniit takinerusunik pisiortussasut ilimagaa.
Ilulissani Uummannamilu aalisartut umiatsiaararsortut ukiuni kingullerni amerliartorput, tamannalu aalisartunut umiatsiaararsortunut taamaallaat paggatassiisarnermik ilaatigut pissuteqartoq taanna oqarpoq. Taamaammat pisassiissutinik pigisaqartut paggatassiissutinik aalisarnermituut tamakkiisoqakkajunneraniit allaanerusumik pisassiissutit tamakkerneqarnissaat ernumaginagu qaqugu sumilu aalisarnissartik namminneq aalajangersinnaalermassut aalisarneq siunissami sumiiffimmut isorartunerusumut siammarneqassasoq taanna isumaqarpoq.
