Qallunaat naalakkersuisui: Kalaallit namminneq aalajangigassaat
Qallunaat naalakkersuisuisa nunatsinni suliniutit angisuut pillugit inatsit akimmisaartinniarunanngilaa
Sapaatit akunnerani kingullermi paasineqarpoq naalakkersuisut siulittaasuat Kuupik Kleist IA-meersoq naapertorlugu ministeriunerup Helle Thorning-Schmidip Socialdemokratineersup 'nunatsinni nunanit allamiunut suliartortoqarnissaanik pisariaqartitsineq akimmisaartinnianngikka’.
Aamma ministerit Socialdemokratineersut marluk inatsisinik atortitsinermut ministerip Morten Bødskovip suliffeqarnermullu ministerip Mette Frederiksenip immikkut ittunik inatsit ajoriffissaqartinngikkaat, taamaallillutik nunanit allamiut atorfinissinnaallutik.
Læs "Medie: Danmark giver grønt lys"
Ullumikkut Politiken allappoq aningaasaqarnermut nunamullu namminermut pissutsinut ministeri Margrethe Vestager Radikale Venstreneersoq qanittukkut oqaaseqarsimasoq qallunaat naalakkersuisui akornusersuinianngitsut.
- Tamanna tamakkiisumik kalaallit aalajangigassaraat (...). Kalaallit namminerminnut tunngasunik inatsisiliornermik akisussaanerat pitsaanerpaatut isigaarput. Tamanna kalaallit akisussaaffigaat. Tamannalu ataqqilluinnarpara, Margrethe Vestager oqarsimavoq.
- Isumaqarputit akornutissaqanngitsoq Kinamiut Kalaallit Nunaanni sulinissaat akunnermut 30 koruunisiaqarlutik?
- Aap, tamanna kissaatigippassuk, Margrethe Vestager Politikenimut akivoq.