Qaqortumi timmisartoqarfittaartariaqarpugut
Assartuussineq pillugu Isumalioqatigiissitap Qaqortup timmisartoqarfeqalernissaanik inassuteqaataa Siumut Qaqortup taperserpaa
Siumut Qaqortup innuttaasut kajumissaarpai sisamanngorpat nal. 12.30 tissaluttumiit kommuunip ataatsimiittarfiannut mittarfissamik tapersersuinertik takutinniarlugu ingerlaaqqataaqqullugit.
Taama Lars Lundblad, Siumut Qaqortoq siulittaasua tusagassiivinnut nalunaaruteqarpoq.
Taassuma naqissuserpaa, Siumut Qaqortup Assartuussineq pillugu Isumalioqatigiissitap Qaqortumi timmisartoqarfiliornissamik inassuteqaataa tapersersoritsik, soorlu Kommune Kujallermi borgmester Simon Simonsenip tamanna pillugu oqaaseqaatai tapersersorlugit.
Timmisartoqarfik sananeqassagaluarpat nunap tamarmi iluaqqutigissavaa, Lars Lundblad naliliivoq.
- Qaqortumi 1199 m. mittarfiliornissamut atatillugu, inuussutissarsiorneq takornariartitsinerlu pilersaarusiorluarneqassapput. Kuannersuarni imaluunniit Killavaani aatitassarsiorneq aallartippat pissutsit nutaanngortussaapput, tamatumani Qaqortumik mittarfeqarneq, taanna nangippoq.
- Qaqortoq timmisartoqarfittaanngippat ineriartorneq unissaaq, Lars Lundblad naliliivoq.