Qeqertani qaamaqqutit
Nunatsinni illoqarfiit nunaqarfiillu tamarmik innaallagissiorfeqarput, Qeqertat kisimi pinnani
Ullumikkut inuit 29-t Qeqertani najugaqarput, angutit 18-it arnallu 11-it, Qaanaamiilli timmut 40 kilometerinik ilorpasitsigisumi nunaqarfik ukioq kaajallallugu piniarfigittorsuugami inoqarnerusinnaagaluarpoq.
Nunaqarfiup eqqaa qaleraleqartoq paasineqarpoq, aalisarnermullu naalakkersuisoq Ane Hansennalunaarpoq Qaanaap eqqaani aalisarnerup piorsarnerani Qaasuitsup Kommunia Thulefondenilu suleqatigilluarneqartut.
Siumumiit Kristian Jeremiassen Inatsisartuni pingasunngormat ualikkut siunnersuuteqarpoq Qeqertat innaallagissiorfittaartariaqartoq: Nunatsinni illoqarfiit nunaqarfiillu tamarmik innaallagissiorfeqarput Qeqertat kisimik pinnatik.
– Nunatsinni ukiuunerani issinnerpaamik taarnerpaamilu innuttaasut inuupput, innaallagissiorfeqaratilli Qeqertarmiut radio tusarnaarsinnaanngilaq, tv isiginnaarsinnaanagu, avammullu attavituaralugu radiotelefoni ataaseq, oqarasuaatit angallattakkat atorneqarsinnaanngilla, aamma Qeqertami internet atorneqarsinnaanngilaq, Kristian Jeremiassen oqarpoq.
Nunatsinni nukissiuuteqarnikkut suliffeqarfiup Nukissiorfiup ilimagaa Qeqerrani innaallagissiorfik 5.175.000 aamma 9.500.000 koruunit akornanni akeqassasoq apeqqutaalluni qanoq ittuunersoq, kingorlu ingerlatsinermu, uuliamut, sulisunut aserfallatsaaliinermullu aningaasartuueqartoqassaaq.
Kristian Jeremiassenip upernaaq manna paragraf 37 naapertorlugu apeqqutigaa naalakkersuisut Qeqertami sunik pilersaaruteqarnersut, ineqarnermut, attaveqarnermut angallannermullu naalakkersuisoq Jens B. Frederiksen im akilluni:
– Qeqertani innaallagissiorfiliornissamik pilersaaruteqanngilagut, Qeqertami inoqassutsimut sanilliullugu sanaartornermut aningaasartuutissat annertuallaarmata.
Naatsorsorneqarsimavoq innaallagissamik tunisassiorneq kilowatttimemut 20-50 koruuneqassasoq. Sanaartornermi aningaasartuutit apeqqutaassaaq, sarfarlu qanoq annertutigisoq atuisunut tunineqarnersoq. Nunaqarfiit Nukissiorfinnit pilersorneqartut minnersaat sanilliukaanni akisuvoq. Oqaatsuni kWh.p ataatsip tunisassiarinera 10,89 koruuneqarpoq, Igalikumi 5,53 koruuniulluni. KWh-p akiata annerpaaffissaa 3,48 koruuniusoq taamaalilluni qaangerneqarpoq, tassalu atuisup akiligassaa tunisassiornermi akia apeqqutaatinnagu.
Qeqertat aamma Pilersuisoqanngillat, toqqorsiveqarlutilli, ukiumullu 650.00 koruuninik kaaviiaartitsisoqarneratigut Qeqertat nunatsinni nunaqarfiupput appasinnerpaamik kaaviiaartitsiffiusut, KNI A/S nalunaarpoq.