Qeqertarsuatsiaat eqqaanni anorthositimik piiaanissamut pilersaarut tusarniaassutigineqartoq

Greenland Anorthosite Miningip ukiumut anorthosit 800.000 tonsit Qeqertarsuatsiaat Kangerluannit, Nuup kujataaniittumit, avammut tuniniartalernissaaalernissaa pilersaarutigaa.

Aatsitassarsiortitseqatigiiffik 2019-imi pilersinneqartoq Greenland Venturemit aamma Vækstfondenimit 2020-mi upernaakkut 3 millionit koruuninik aningaasaliiffigineqarpoq.

Januaarimi 2023-mi VSB-mut aamma VVM-imut nassuiaatinut nalunaarusiatik tusarniaassutigaat, maannalu nassuiaatit inaarutaasumik 2025-mi februaarip 19-iata tungaanut tusarniaassutigineqarlutik.

Tusarniaalluni ataatsimiititsinerit

Suliniummi pineqarpoq piiaaffimmit ammaannartumit piiaanissaq, tamaanilu aatsitassanik suliarinnittarfik atortorissaarutillu anorthositimik akuiaassutit, ilaatigut oqorsaanermut, immikkut ittunik igalaaminiliornermut, qalipaatiliornermut marriornermilu atorneqartartunik tunisassiornermut atorneqartussamik.

 Illoqarfinni nunaqarfinnilu pineqartuni, tassa Nuummi, Paamiuni Qeqertarsuatsiaanilu, januaarip 20-annit 22-annut tusarniaanerit ingerlanneqassapput. Ataatsimiinnerni peqataassapput aatsitassarsiortitseqatigiiffimmit aallartitat aamma Kommuneqarfik Sermersuumi borgmesteri, Avaaraq S. Olsen, Inuussutissarsiornermut, Niuernermut, Aatsitassanut, Inatsisinik Atuutsitsinermut Naligiissitaanermullu Naalakkersuisoq, Naaja H. Nathanielsen aamma Nunalerinermut, Imminut Pilersornermut, Nukissiuutinut Avatangiisinullu Naalakkersuisoq, Kalistat Lund.

Suliffiit nunamullu isertitassat

Naaja H. Nathanielsenip Sermitsiamut oqaatigaa, Naalakkersuisunit neriuutigigitsik, Greenland Anorthosite Miningip suliai piiaaffimmik ammaanermik kinguneqarumaartut.

– Aatsitassarsiorfik suliffissanik, nunamut nutaanik isertitassanik najukkamilu inuussutissarsiortunut suliassanik kinguneqartitsissaaq. Naalakkersuisut aamma pingaartippaat Greenland Anorthosite Miningip suliniutini avatangiisinut najukkamilu inuiaqatigiinnut innimiginnilluni aaqqissuutissagaa. Taamaattumik tusarniaanerit aatsitassarsiornissamut suliniutit pilersinneqarneranni pingaaruteqarput. Taamaattumik soorunami neriuutigaara sapinngisamik amerlanerpaat ataatsimiinnerni tulliuttuni peqataassasut. Tunngavilersuutit tamarmik pimoorunneqartarput.

 Nunami allamiu piginnittoq

Greenland Anorthosite, Greenland Gold Resourcesimit pigineqarpoq, piginnittut pingaarnerit tassaallutik nunarsuarmi aatsitassarsiornermik ineriartortitsisartut Jean Boulle Group, aatsitassarsiortitseqatigiiffimmi piginneqataassutit 51 procentiinik piginnittoq, taannalu sinnerlugu sulisut tassaallutik Mike Jimmy Tong Sam, Luxembourgimi najugalik, Edward Wayne Malouf USA-mi najugalik aamma Audrey Hoe-Richardson, Jean-Raymond Boullemut, Jean Boulle Groupimi pisortamut ukiorpassuarni allattaasoq. Jean-Raymond Boulle Mauritiusimi inunngorsimasoq Monacomili najugalik, 1996-imi Canadami Voisey Bayimi aatsitassarsiornermik suliniutini tunigamiuk milliardinik isertitaqarsimavoq. Jean-Raymond Boulle ullumikkut 75-inik ukiulik Kalaallit Nunaanni ingerlatseqatigiiffimmi Greenland Feldspar Aluminium Ressourcesimi 80 procentinik piginneqataavoq, Greenland Silver Moly Ressourcesimi 80 procentinik Greenland Vanadium Energymilu 80 procentinik piginneqataalluni.

Isumalluut asseqanngitsoq

Greenland Anorthosite-mi pisortaavoq Claus Stoltenborg, aningaasarsiornermik suliaqartarsimasoq. 21st North-imeersut Anders Nørby-Lie aamma Claus Østergaard aamma Greenland Anorthosite-mi pisortaaqataapput.

Aatsitassarsiortitseqatigiiffimmit oqaatigineqartut naapertorlugit, Qeqertarsuatsiaani

anorthositeqarfik annertussutsimnigut akuissutsimigullu immikkuullarissuuvoq, tamannalu misissuinermik ingerlatsivimmit ALS-imit aamma aatsitassarsiornermik siunnersortitut ingerlatsivimmit SRK-mit uppernarsarneqarpoq. Taamaalilluni anorthosit pineqartoq alkalimetalimik 2 procenti ataallugu akoqarpoq, saffiugassarlu taamaalilluni ilaatigut glasfiberiliornermut piukkunnarluartuulluni.