Qeqertarsuup Sulluani juullimut angallassisoqassaaq
Umiarsuaatileqatigiit Disko Line A/S juullip nalaani nammineq akilikkaminik angallassisarniarpoq.
Tamanna siorna saaffiginnissutit arlaiugaluartut iluatsissimanngilaq. Maanna umiarsuaatileqatigiit Disko Line A/S ilaasortaatinik Aleqa Ittuk aamma Aviaq Ittuk juullikkunni angallassiniarluni misiliiniarpoq.
Umiarsuit angallassineq januaarip 9-ani unitsissavaat, taamanikkussamut juullimi angallanneq taamaateriissangatinneqarmat.
– Aasianniit, Kangaatsiamiit Qasigiannguanilu tapersiissunik tutsiuttoqartareerpoq, taakkunaniit decembarip qaammataani ilaquttamik tikeraarnissaannut imaluunniit illoqarfinnut allanut niuerniarnissaminnut periarfissaqaleramik. Siorna juullimut angalanissaq pilersaarusiorsinnaasimanngilarput angalanissamut pilersaarutit nutaat sioqqutsilluarluni saqqummiunneqartussaaneri pissutigalugit, Disko Line A/S-imi pisortaasoq Ole Dorph Sermitsiaq.gl-imut oqarpoq.
– Juullimut angallassinerit ingerlatissavavut namminersornerusunut kiffartuussinissamut isumaqatigiissutigisimasatta avataatigut. Nammineq akisussaaffik tigussavarput, aamma aappaagumut taamaalioqqikkusukkaluarpugut, maanna juullimut angalaassinissat atorluarneqassappata, Ole Dorph oqarpoq.