Qeqertarsuup Tunuani assartuineq sivisunerulertoq
Qeqertarsuup Tunua ukiuunerani sikussaarmat Royal Arctic Line aamma Pilersuisoq illoqarfinnut imaatigut nioqqutissanik sivisunerusumik pilersuisinnaanngorpoq. Nunaqarfiilli ukiukkut tikinneqarneq ajormata tamanna nioqqutissanik amigaateqarnermik kinguneqartarpoq.
Ukiut kingulliit Qeqertarsuup Tunuata annerpaartaa ukiuunerani sikuneq ajorpoq, taamaattumillu sila sikulu ajortinnagit Royal Arctic Line aamma Pilersuisoq illoqarfinnut imaatigut assartuinissamut periarfissarissaarnerulerput.
Aviisi Sermitsiaq taama allappoq.
Naak ukiuunerani periarfissaqartillugu illoqarfinni nioqqutissanik pisariaqartinneqartunik pilersuineq ingerlaannartaraluartoq, nunaqarfiit umiarsuarmik tikinneqarneq ajorput, tamannalu nioqqutissanik amigaateqalernermik kinguneqartarpoq.
Angalanissanut pilersaarutit allanngunngitsut
Royal Arctic Linep 2022-imi ukiuunerani illoqarfinnut nunaqarfinnullu angalanissaanut pilersaarutit naapertorlugit, umiarsuaq containerersuut Qeqertarsuup Tunuanut ullut 14-ikkaarlugit tikittarpoq, kiisalu umiarsuaaqqat nunaqarfiliartaatit aamma ullut 14-ikkaarlugit Qeqertarsuarmut Kangaatsiamullu angalasarlutik. Angalanissalli taakku sikoqartinnagu aatsaat ingerlanneqarsinnaasarmata, aappaluttumik nalunaarsorneqartarput. Tassa imaappoq angalanissamut pilersaarutit allanngunngikkaluartut, taamaattoq sikoqartinnagu immikkut pilersuisoqarsinnaanera periarfissaatinneqarpoq.
Royal Arctic Line-p pisortaa Niels Clemensen naapertorlugu, Qeqertarsuup Tunuani ukiorlutsinnagu siku pilersuinissanut akornutaaneq ajorpoq.
- Kitaatali sikua Aasiaat kujtaanut anngukkaangat Qeqertarsuup Tunuanut pilersuisinnaajunnaartarpugut, taanna oqarpoq.