Qeqqussanik avammut tunisassiulernissamut takorluugaq
Qeqqussanik nunanut allanut niueruteqartalernissaq Nikoline Ziemerimit anguniarneqarpoq
Nikoline Ziemer qeqqussanik naatitsinermut qeqqussanillu katersinermut periarfissanik misissuilluni 2015-imi aallartippoq. Nunanut avannarlernut angalasaqattaarnermigut suliniutinik qeqqussanik katersinermut naatitsinermullu tunngasunik ukiuni arlalinni misissuereerluni qeqqussanik naatitsinermik misileraanissi toqqarpaa.
Royal Greenlandimi tunisassiassanik inerisaavimmi ingerlatsisoq Nikoline Ziemer qeqqussanik Maniitsup eqqaani misileraalluni naatitsinermik 2018-imi ukiakkulli suliaqarpoq.
- Qeqqussanik nunanut allanut niueruteqartalernissarput tunngaviusumik anguniarlugu qeqqussanik naatitsisalerpugut. Siunissami ungasinnerusumi qeqqussanik ukiumut 40 tonsinik sapinngisamilli 100 tonsinik naatitsisalernissara angorusuppara. 2020-lli tungaanut misileraanera qanoq ingerlajumaarnersoq piffissap takutikkumaarpaa, Nikoline Ziemer Royal Greenlandip nittartagaanut oqarpoq.
Naatitsinerup ingerlarnga sivisusarpoq, qeqqussallu naatitsinermut atugassat tunisassiorfimmi passunneqaqqaartarput. Qeqqussat naatitsinermut atugassat immamut inissitsinnagit baalianut ikillugit kinguaassiortinneqartarput.
Nikoline Ziemer qeqqussanik naatereersimasaanit annertunerusunik naatitseqqinnissaminut piareersaleruttorpoq.