Qernertuinnarmik pujuliorluni imaatigut assartuineq
Royal Arctic Linep umiarsuaatai uulia kinertoq atorlugu suli angalajuarsinnarput, naak taanna nunarsuarmi ikummatissanit tamanit mingutsitsinerpaajugaluartoq.
»Royal Arctic Linep umiarsuaatai nunap iluaneersut ikummatissat atorlugit angalasarput, tamatumuuna CO2-mik annertuumik aniatitsisarluni. Tamanna silap pissusianut avatangiisinullu annertuumik nalorninartorsiortitsisuusutut isigineqartarpoq.«
Taamatut allappoq Royal Arctic Line CSR pillugu nalunaarusiamini 2020-meersumi. Tassa allatut oqaatigalugu namminneq nalunngilaat avatangiisinut sunneeqataanertik annertuujusoq.
Aviisi Sermitsiaq taama allappoq.
Nalunaarusiami atuarneqarsinnaavoq Royal Arctic Linep umiarsuisa uulia kinertoq (Heavy Fuel Oil) 20.375 tons atorsimagaat, kiisalu Marine Gas Oil, svovlimik akukinnerusoq 8.283 tons, taamaattumillu annikinnerusumik mingutsitsisoq atorsimagaat. Kåre Press-Kristensen, uani Rådet for Grøn Omstilling siunnersortaasoq aamma avatangiisit pillugit suliaqatigiiffimmik Clean Arctic Alliance-mik pilersitseqataasoq, naapertorlugu annertussutsit taakkua assigaat Kalaallit Nunaata CO2-mik katillugit aniatitsinerata 20 procentiata missaannik silap pissusianut sunniuteqarnera.
– Royal Arctic Linep uuliamik atuinerata assigingajappaa 1.285 terajoule, tassa imaappoq Kalaallit Nunaata ikummatissanik nunap iluaneersunik atuinerata 17,5 procentiata missigivaa aamma tamanna Kalaallit Nunaata CO2-mik katillugit aniatitsinerata 20 procentiata missaannik silap pissusianut sunniuteqarpoq. Taakkua 85.000 tonsit CO2, umiarsuit ukiumut aniatittagaasa assigaat biilit inunnik angallassissutit atorlugit ækvatorip eqqaatigoorluni nunarsuaq 16.500-riarluni kaajallakkaanni silap pissusianut sunniuteqarnera. Tassa imaappoq nalunaaquttap akunneranut nunarsuaq marloriangajallugu kaajallallugu ... ulloq unnuarlu akunnerni 24-ni ... ukioq tamaat.
Aviisimi Sermitsiami atuarnerusinnaavutit. Aviisi uani pissarsiariuk: