Qilalukkat qernertat aatsaat taama ikitsigisut kisitsinermi paasinarsivoq
Innuttaasut neqinik nutaanik pilersorneqarnissaat eqqarsaatigalugu Naalakkersuisut Tunumi qilalukkanik qernertanik pisassiissuteqartuarnissartik siunnersuutigaat. Qilalukkalli qernertat aatsaat taama ikitsigisut kisitsinerup kingulliup takutippaa, taamaattumillu piniagaanngiivinnissaat innersuussutaavoq.
Assi: Sermitsiaq.AG
Kisitsineq kingulleq Tunup kujataani aatsaat taama qilalukkat qernertat ikitsiginerinik takutitsisoq, innersuussummik tamassuminnga tapersiutaavoq.
Pinngortitaleriffiup nalunaarusiaani ukioq manna Naalakkersuisunut tunniunneqartumi taamatut inerniliisoqarpoq.
Naalakkersuisut Tunumi qilalukkat qernertat pisassiissutissaannik siunnersuutaannut nalunaarusiaq ilanngunneqarpoq, Naalakkersuisulli innersuussut malinnianngilaat.
Akerlinganilli innuttaasut neqinik nutaanik pilersorneqarnissaat qulakkeerniarlugu qilalukkat qernertat katillugit 41-t pisassiissutigineqarnissaat siunnersuutigineqarpoq.
Uumasoqatigiiaat aatsaat taama ikitsigisut
Kisitsineq Pinngortitaleriffiup nalunaarusiaani allaatigineqartoq 2022-mi aggustimi septembarimilu ingerlanneqarpoq.
Tunumi qilalukkat qernertat pillugit paasisaqarnerunissaq anguniarlugu kisitsineq politikkikkut suliakkitaasimavoq. Kisitsinerit inernerisa NAMMCO-mit ilisimatuussutsikkut atorneqarnissaat siunertaavoq, taakkulu atorlugit qilalukkat qernertat piujuaannartitsinissamik tunngaveqarluni piniarneqartarnissaat pillugu piniartut siunnersuineri atorneqarsinnaasussaapput:
- Timmisartumik nalinginnaasumik misissuilluni ingerlaartarnerminngaannit 200 meterit ataallugit ingerlaartoqarpoq, kiisalu kilometerit katillugit 2260-imik isorartutigisoq misissuiffigineqarluni, taamaalilluni qilalukkat qernertat katillugit 25-t takuneqarput. Tasiilap aqutsiveqarfiani (Kangerlussuup kujataani) qilalukkanik qernertanik takusoqanngilaq.
Uumasoqatigiiaat pillugit ilisimatusartut ilimagisaat kisitsinerup uppernarsarpaa — tassa pissutsit ima ajortigilersimapput allaat piniarneqarnissaminnut ikippallaarlutik.
Ittoqqortoormiini qilalukkat qernertat 441-t takuneqarput, naatsorsuinerli ilisimatuussutsikkut misissuiffigineqarami qilalukkat 365-nngortinneqarput, taannalu NAMMCO-mi ilisimatuussutsikkut ataatsimiitsitaliamit januaarimi akuerineqarpoq:
- Kalaallit Nunaanni Tunup Kujataani manna tikillugu qernertat aatsaat taama ikitsigisut takuneqarput, taamaanneralu uumasoqatigiit siunissaat eqqarsaatigalugu NAMMCO-p assut ernumanartippaa, kisitsineq pillugu nalunaarusiami allassimavoq.
Pissutaasoq isumaqatigiinngissutaasoq
Uumasoqatigiiaat ikiliartulersimasut piniartut ilisimatusartullu isumaqatigiissutigigaat, nalunaarusiami atuarneqarsinnaavoq.
Tamatumunngali pissutaasoq pillugu taakku marluk isumaqatigiinngillat:
- Kalaallit Nunaanni Tunup Kujataani qilalukkat qernertat piniarneqarpallaartarnerisigut siammarsimanerisa amerlassusaasalu ikilisimanerannut ilisimatusartut peqqutaasorinnipput, silaannaalli allanngornera aamma umiarsuit takornariartaatit akornusersuisarnerat peqqutaasoq piniartut isumaqarput. Timmisartumik kisitsinerit inerneri piniartut naammaginngilaat, qilalukkanilli kisitsisarnermi periutsinik allanik siunnersuuteqartoqanngilaq, Pinngortitaleriffiup nalunaarusiaani allassimavoq.
Nalunaarusiaq aamma Naalakkersuisut 2025-mi qilalukkat qernertat pillugit pisassiissutissatut siunnersuutaat Naalakkersuisut.gl-imi atuarneqarsinnaapput.
