Qitiusumik inissiinikkut uumasut nakorsaannik amigaateqarneq aaqqinneqassaaq

Kujataani uumasut nakorsaattut atorfeqartoq kingulleq sivikitsumik atorfeqareerluni aallarpoq, inuttassarsiuussinermilu annertuumik ajornartorsiortoqareersoq maanna uumasut nakorsaqarfiata inissinneqarnissaa pilersaarusiorneqarpoq, uumasullu nakorsaat nunatsinni tassanngaanniit angalasinnaassapput.

Neqimi ukiumoortumik toqoraasoqarnerani uumasut nakorsaat Danmarkimeersut toqoraanernik nakkutilliiaartortillugit piffissami sivikitsumi suliartortinneqartarput.

Uumasut nakorsaannik Kalaallit Nunaannut suliartortitsiniarneq ajornakusoorpoq, tamatumalu kinguneranik juunimi 2022-mili kujataani uumasunut nakorsaqanngilaq, naak tassani nunalerisoqarluni savaateqartoqarmat, hiistiuteqartoqarmat aamma nersussuaateqartoqarmat kiisalu qimmiuteqartoqarlunilu qitsuuteqartoqarmat pisariaqartitsisoqaraluarpoq.

Kujataani uumasut nakorsaat kingulleq piffissami sivikitsumi atorfeqareerluni tunuarpoq, aalisarnermut piniarnermut naalakkersuisoq, Karl Tobiassen (S), Inatsisartunut ilaasortamut Mariane Paviasenimut akissuteqarnermini ilisimatitsivoq.

Naalakkersuisut qanoq iliorniarnersut, Paviasenip paaserusuppaa, qitiusumillu inissiisoqarnissaa oqaatigaat.

Atorfinitsitsiniarnerup ajornakusoornerata kinguneranik Nuummi qitiusumik uumasunut nakorsaqarfimmik inissiisoqarnissaa sulissutigineqartoq, Karl Tobiassen ilisimatitsivoq:

Uumasut nakorsaannik amigaateqarneq

- Tassanngaanniillu avannamut kujammullu ukiumi piffissap ilaatigut pisariaqartitsineq naapertorlugu angalasarnissaq sulissutigineqaraluartoq, peqatigisaanillu piffissami sivikinnerusumi taartaasartussanik sulisussarsiortarnissaq sulissutigineqarluni, assersuutigalugu savat piaqqiornerisa aammalu savaaqqanik toqoraanerup nalaani, Karl Tobiassen taama akissuteqarpoq.

Tobiassenip oqarnera naapertorlugu, Kujataani uumasut nakorsaattut atorfik arlaleriarluni kinguneqanngitsumik inuttassarsiorneqartarsimavoq, atorfinitsitsiniarnermilu ajornartorsiutit pillugit ima allappoq:

- Nalinginnaasumik nunarsuaq tamakkerlugu uumasut nakorsaat amigaataapput aammalu suliffinni atugassarititat, suliffiup angerlarsimaffiullu oqimaaqatigiissuunissaanik kiisalu suleqatigiittut isumasioqatigiittarnissamik suleqatigiilluarnissamillu ukkatarinninnerit annertusiartortillugit siunissami uumasut nakorsaannik ilinniarsimasunik naleqquttumik sumiiffinni atorfinitsitsiniarneq ajornakusuussalluni.

Danmarkimit uumasut nakorsaannik neqinik nakkutilliinermut suliartortitsisartut

Nunatta qeqqani avannaanilu sulisoqarnermut tunngatillugu Avannaani uumasut nakorsaannik ataatsimik marlunnilluunniit atorfeqartitsisoqartartoq, naalakkersuisoq ilisimatitsivoq, taakku pingaarnertut qimmit qimuttut kiisalu angerlarsimaffimmi uumasuutigineqartut nakorsaqarfinni namminersortuni isumagineqartarput.

Nuummi Uumasunut Nakorsaqarfik Inuussutissalerinermullu Oqartussaaffiup qitiusumik allaffeqarfiani uumasut nakorsaat sisamanik inuttaqartinneqarpoq, taakkuli aamma nunap ilaani sumiiffinni allani suliassaqartarput.

Uumasut nakorsaat oqartussaaffimmeersut ilaatigut Neqimi savanik toqoraasunut angalasarput, tassanilu neqinik nakkutilliisarlutik, kisianni toqoraanermut atatillugu Danmarkimi uumasut nakorsaannik saniatigut suliartortitsinissaq pisariaqartarsimavoq.

Oqartussaaffik 2022-mi neqinik nakkutilliisussanik suliartortitsinermi akissarsianut, angalanermut ullormullu aningaasarsianut 311.429,32 koruunit aningaasartuutit atorpai.

Powered by Labrador CMS