Aalisarnermut
inatsisip nutaap ukiortaami atuutilernerata kingorna nalunaarutit
assigiinngitsut arlallit tusarniutigineqareerlutik inatsimmut ilanngunneqarput,
tamannalu aalisarnermut inatsisissap naammassineqarani tuaviuussaalluni
atuutilersinneqarnissaanut ersersitsisoq, Kalaallit Nunaani Aalisartut
Piniartullu Kattuffiani, KNAPK-mi siulittaasup Nikkulaat Jeremiassenip
siusinnerusukkut Sermitsiamut oqaatigaa.
Nalunaarutit pingaarutillit
assigiinngitsut aalisarnermut inatsisissamut naafferarlugit atuutilersinneqarnerat
siunissamut sattaaserluni sulinertut isigineqartariaqartoq, tamannalu
aalisartorpassuarnut annertuumik kingunerlussinnaasoq, taassuma aamma
oqaatigaa.
Aalisarnermut
inatsisip nutaap ukiortaami atuutilernerata kingorna nalunaarutit
assigiinngitsut arlallit tusarniutigineqareerlutik inatsimmut ilanngunneqarput,
tamannalu aalisarnermut inatsisissap naammassineqarani tuaviuussaalluni
atuutilersinneqarnissaanut ersersitsisoq, Kalaallit Nunaani Aalisartut
Piniartullu Kattuffiani, KNAPK-mi siulittaasup Nikkulaat Jeremiassenip
siusinnerusukkut Sermitsiamut oqaatigaa.
Nalunaarutit pingaarutillit
assigiinngitsut aalisarnermut inatsisissamut naafferarlugit atuutilersinneqarnerat
siunissamut sattaaserluni sulinertut isigineqartariaqartoq, tamannalu
aalisartorpassuarnut annertuumik kingunerlussinnaasoq, taassuma aamma
oqaatigaa.
Aalisarnerup
teknikikkut iluarsartuussivigineqarnera pillugu Namminersorlutik Oqartussat
nalunaarutaat ukioq atuutilersinneqartunut ilaavoq, taannalu Ilulissani Isortaq
Trawl ApS-ip sinerissap qanittuani kilisaammik uuterisumik pisinissaanut
aporfiliisoq, suliffeqarfimmik piginnittut oqaatigaat.
Nalunaarut aporfiliisoq
Nalunaarut
pineqartoq naapertorlugu tunngaviusumik titarnermit 3 sømilit iluanni, Sisimiut
karsimi aamma Qeqertarsuup Tunuani karsimi aalisariutit 40 meterit sinnerlugit
tamakkiisumik takissusillit imaluunniit 1.000 bruttotonsit sinnerlugit
usisinnaassusillit raajarniaqqusaanngillat, sumiissutsillu taaneqartut iluini
raajartat angallammi tunisassiareqqusaanngillat, nunamulli tunisassiorfimmi
suliareqqitassanngorlugit tulaanneqassallutik. Ingerlataqartunut, nalunaarutip
atuutilernissaata tungaanut, aalisariummi Qeqertarsuup Tunuani pisaminnik
tunisassiorsinnaanermik akuersissuteqarsimasut, angallammik taassuminnga
atuillutik suli sumiiffimmi aalisarnissamut akuersissummik tunineqarnermikkut
akuerineqassapput. Ingerlataqartulli angallatini taarsissappagu imaluunniit
piffissap ilaani akuersissutini angallammut attuumassuteqartinngippagu,
akuersissut annaaneqassasoq, raajarniarneq pillugu nalunaarummi ilaatigut
allassimavoq.
Ilulissani
Isortaq Trawl ApS sinerissap qanittuani raajarniutinik pingasunik
kilisaataateqarpoq, taakkulu nutaanngilimmata tamaasa atorunnaarlugit,
sinerissap qanittuani kilisaammik nutaaliaasumik uutiterivittalimmik
anginerusumillu ataatsimik taarsernissaat piginittut kissaatigaat – sulialli
ingerlateqqinnissaannut nalunaarut maanna aporfiliisoq, suliffeqarfiup pisortaa
Sofie Sandgreen oqarpoq.
Naak
politikkikkut neriorsuutit?
Aalisarnermut
inatsisissaq Isortaq Trawl ApS-mik piginittut ukiorpassuarni utaqqisimavaat,
ukiorlu nutaaq aallarnerfigalugu atuutilermat pitsaalluinnartutut nalilerpaat. Upernaalli
ingerlanerani nalunaarutit arlallit atuutilersinneqarput, nalunaarullu uani
pineqartoq Isortaq Trawlip sinerissap qanittuani raajanik uutiterisumik
kilisaatitaarnissaanut annertuumik aporfiliisoq, Sofie Sandgreen
erseqqissaavoq.
- Nalunaarut
naapertorlugu kilisaataatitsinnut pingasuusunut sinerissap qanittuani
pisassiissutit kilisaammut nutaamut pissarsiariniakkatsinnut
nuunneqarsinnaanngillat, kilisaat pissarsiariniagarput sinerissap avataani
taamaallaat raajarniarsinnaammat.
- Taamaalilluni
sinerissap qanittuani raajanik uutiterisumik nutaamik
kilisaataatitaarniarnitsinnut periarfissaq mattunneqarpoq, taanna oqarpoq.
Ukioq
Ilulissani Inatsisartunut qineqqusaartoqarneranut atatillugu kikkut nalunaarut
pineqartoq allanngortinniarlugu suliniuteqarniarnersut pillugu Sofie Sandgreen
partiinut tamaut apeqquteqarpoq. Partiit tamarmik ajornartorsiut pillugu
aaqqiissuteqarusullutik taamanikkut oqaatigaat, taamaakkaluartoq suli maannamut
politikkikkut qanoq iliuuseqartoqarniarneranik tusagaqaratik, Isortaq Trawlip
pisortaata oqaatigaa.
Utaqqineq
akisoorujussuanngussasoq
Isortaq
Trawlimik piginneqataasup Hans Sandgreenip oqarnera naapertorlugu, kilisaammik
nutaamik sanatitsineq maannakkut akisoorujussuuvoq, taamaattumillu
aningaasatigut tunngavissarissaarpat aatsaat nutaamik
kilisaatitaartoqarsinnaavoq.
- Kilisaammik
raajanik uutiterivittalimmik pisaarnissarput soqutiginerpaavarput, kisiannili
pilersaarut maanna annertuumik kinguarsarneqarpoq, tamannalu piffissap
ingerlanerani pilersaarutip akisuneruleraluttuinnarneranik kinguneqassaaq.
- Nalunaarut
allanngortinneqanngippat sinerissap qanittuni raajarniarnerup imminnut
akilersinnaajunnaarneranik kinguneqarsinnaavoq, allannguisoqanngippallu
pilersaaruterput piviusunngortissinnaanngilarput, taanna oqarpoq.
Suliffeqarfiup
raajarniarnermik ingerlataqartup Isortaq Trawl ApS-ip Hotel Nuka, Café Nuka,
Restaurant & Bar Iluliaq aamma Café Iluliaq ilaatigut ingerlatarai.
Misissuineq
ingerlasoq
Aalisarnermut
inatsimmut allannguutissanik ilassutissanilluunniit nutaanik siunnersuusiorsinnaaneq suli
piareersarneqarmat, aalisarnermut inatsimmi suut allanngortinneqassanersut suli
oqaatigineqarsinnaanngikkallartoq, Aalisarnermut, Piniarnermut, Nunalerinermut
Imminullu Pilersornermut Naalakkersuisoq Peter Borg, Demokraatit, Sermitsiamut
paasissutissiivoq.
