Raajartassat 2010-mi allanngussanngillat
Naalakkersuisut aalajangerpaat raajanik pisassat 2010-mi allanngoratik 115.000 tonsit missaanniiginnassasut. Aaliarnermik inuussutissarsiuteqartut tusarniaaviginerat Pinngortitaleriffiullu inassutai tunngavigalugi taama aalajangerput.
Avataasiorluni aalisarnerup nakkutigineqarnera pillugu nalunaarut sinerissallu qanittuani raajarniarneq pillugu nalunaarut qanittumi iluarsaanneqassapput, tamannalu pissutigalugu 2010-mi TAC 2009-imiit allaanerussanngilaq.
Imaappoq 2010-mi raajanut TAC (pisarineqarsinnaatitaasut) 114.570 tonsiussaaq, taakkunannga 4.000 tonsit EU-mut 110.570 tonsillu kalaallit aalisartut pisassaat.
Kitaani sinerissap qanittuani avataanilu raajarniartoqartarpoq. Aalisarneq pillugu inatsisartut peqqussutaanni allassimavoq, Kitaani raajartassat 57 procentii avatani pisarineqartassasut 43 procentiilu sinerissap qanittuani pisarineqartassasut.
Imaappoq avataasiortut 63.024,9 tonsit 47.545 tonsillu sinerissap qanittuani aalisartut pisarissavaat, 4.000 tonsillu EU-p, EU-mut isumaqatigiissut malillugu, pisarissallugit.
Ilisimatuut inassutigisaat 2009-miit allanngunngillat. 2010-mi 110.000 tonsit inassutigineqarput allaat ikinnerusinnaanerat Pinngortitaleriffimmiit kissaatiginartinneqarluni, tassalu raajanut tunngatilugit piumasarineqartut taamaapput, naalakkersuisut allapput.
Kitaani inassutigineqartartut 1990-ikkut naaneranniilli qaffakkiartorsimapput 2004-mi 2005-imilu amerlanerpaajusimallutik.
Tunumi TAC-mi 2004-miilli allanngorsimanngilaq 2010-milu aamma allanngussanani.