Raajartassat ikileriartut: Milliuunilikkuutaat isertitassat annaaneqaratarsinnaasut
Nunatta kitaani raajartassat ukioq mannamut sanilliullugu 2024-imi 7.500 tonsinik ikinnerulerpata, Nunatta Karsianut isertitatigut milliuunilikkuutaanik annaasaqaataasinnaavoq.
![Raajartassat ikileriartut: Milliuunilikkuutaat isertitassat annaaneqaratarsinnaasut](https://image.sermitsiaq.ag/111239.webp?imageId=111239&width=960&height=642&format=jpg)
Kitaani TAC-mi raajartassat 2024-mi 7.500 tonsinik ikinnerutillugit 102.500 tonsinut inissinneqarnerat, Nunatta Karsianut 19,6 milliuunit koruuninik naleqarsinnaavoq.
- Kitaani TAC-imik raajartassat 102.500 tonsiutinneqarput. EU-p aamma Canadap pisassai ilanngutinngikkaanni nunatsinni kilisaatit raajarniutit 2024-mi 99.214 tonsinik pisassaqarput. 2024-mi raajartassat nunatsinni kilisaatinit tamakkerneqassappata, pisussutit akitsuutaannit isertitat raajanit pineqartut ukioq mannamit 19,6 milliuunit koruuninik ikinnerussapput, Aningaasaqarnermut Akileraartarnermullu Naalakkersuisoqarfimmi pisortaq Nikolai S. Christensen Sermitsiaq.AG-mut ilisimatitsivoq.
Aningaasanut inatsit nalimmassarneqassanngilaq
Isertitat nikittussanngorneri pissutigalugit 2024-mi aningaasanut inatsisissap nalimmassarneqarnissaa pisariaqarsinnaagunartoq eqqarsartoqarsinnaavoq, maannakkuugallartumulli tamanna pilersaarutaanngilaq.
Tamassumunnga nassuiaataavoq raajarniartut siornaammat pisarinngitsuukkanik, ukioq pisassiissuteqarfiusumut nuussiffigineqarsinnaanerat, imaluunniit pisassat aappaagumoortut siumoortumik pisassanngortinneqarsinnaasarnerat.
- Naatsorsuutigineqarpoq 2023-mi pisassanit pisarinngitsuukkat annertungaatsiartut 2024-mut nuunneqarnissaat, Nikolai S. Christensen ilisimatitsivoq. 2024-mi aningaasanut inatsimmi isertitassatut naatsorsuutigineqartup pisassat nikinnerannit isertitassat naatsorsuutigineqartut ilanngunneqareersimapput.
Naatsorsuutigineqartoq
Naalakkersuisoqarfiup pisortaa itisiliivoq:
- Aningaasanut Akileraartarnermullu naalakkersuisoqarfiup naatsorsuutigaa 2024-mi raajat pisassat 106.000 tonsit aalisarneqarsinnaassasut, tassa kitaani 2023-mi pisassat amerlaqataat. Taamaammat pisuussutinit akitsuutigineqartunit isertitassat aningaasanut inatsimmi 2024-moortumi nikisinnagit naatsorsorneqarput, oqartoqarsinnaalluni raajartassat 2024-mi ikinnerugaluartut isertitassatut missingersuutit nikinnavianngitsut.
Nikolai S. Christensen ilassuteqarpoq nunatsinni kilisaatit Tunumi annikitsuinnarmik raajarniartartut, taamaammallu tunumi raajarniarneq akitsuutinit isertitassanut missingersuummi ilanngunneqarsimanngitsoq.