RAL-ip aningaasaqarnermut pisortariligassaagalua tunuarpoq
Jan Egtved Knudsen peqquteqarluni Royal Arctic Line-mi aningaasaqarnermut pisortanngussanngilaq.
Umiarsuaatileqatigiiffik Royal Arctic Line Jan Egtved Knudsen aningaasaqarnermut pisortatut atorfinitsissimallugu marsip 31-ani nalunaaruteqarpoq. Maajip aallaqqaataani aningaasaqarnermut pisortatut atuuffeqalertussaasoq ilisimatitsissutigalugu.
Peqquteqarninili pissutigalugu, atorfinitsinneqarneranut nalunaarut sapaatip akunnera ataaseq qaangiuteriiginnartoq, Jan Egtved Knudsen umiarsuaatileqatigiiffimmi aningaasaqarnermut pisortanngussanngitsoq nalunaarutigineqarpoq.
Nalunaarut pillugu Royal Arctic Line annertunerusumik oqaaseqaateqarniarnani Sermitsiaq.AG-mut ilisimatitsivoq, atorfiullu nutaamik inuttalernissaanut ujaasineq aallartillugu.
Akiliisinnaajunnaarneq
Jan Egtved Knudsen umiarsuaatileqatigiiffimmi Thorco Projects-imi Executive Vice President-itut CFO-tullu atuuffeqarnikuusoq nutaarsiassaqartitsivik Maritime Danmark allappoq. Umiarsuaatileqatigiiffik Thorco Projects 2020-mi akiliisinnaajunnaarpoq.
- Suliffeqarfik akiliisinnaajunnaareersoq suliffeqarfimmi sulisut, Jan Egtved Knudsen ilaatigut, akiliisinnaajunnaarnermut kinguneqartitsisoqarnissaa kuratorikkut suliassanngortitsivoq. Ukiuni pingasuni tulliuttuni suliffeqarfimmik ingerlatseqqusaasoqannginnissaanik eqquisoqarpoq.