RAL-ip Eimskip-illu suleqatigiinertik annertusigaat
Namminersorlutik Oqartussat umiarsuaatileqatigiiffiutaata nassiussassanik ataasiakkaanik Aarhusip quersuaani isumaginnittarnissaq pillugu Eimskip isumaqatigiissuteqarfigisimavaa.
Royal Arctic Line assartuinermini juunip naaneraniit Aalborg aqqusaassaassavaa, taamaammat nassiussat ataasiakkaat nassiussat allat assigalugit Aarhusip umiarsualiviani isumagineqartalissapput.
Niuerfimmi suleqatissarsioreernermi Eimskip Denmark A/S-ip suleqatiginissaa toqqarneqarpoq. Taanna ullumikkut Aarhusip Umiarsualiviani quersuarmik ingerlataqareerpoq Savalimmiunut Islandimullu nammineerluni kiffartuussinerminik isumaginnittuulluni, RAL nittartakkamigut ilisimatitsivoq.
- Royal Arctic Linep sullitaata Danmarkip Nunattalu akornanni nassiuttagaasa assinginik isumaginnittarneq Eimskipip annertuumik misilittagaqarfigaa, Danmarkimilu nassiussassanik tamalaanik isumaginnittarneq pillugu suleqatigiinnissarput qilanaarivarput, Royal Arctic Linemi COO, Ivalu Kleist, oqarpoq.
Nassiussanik isumaginnittarneq
Eimskip Denmarkip Kalaallit Nunaannut Kalaallillu Nunaanniit nassiussanik tamalaanik poortuisarnerlu pillugit Royal Arctic Linemik suleqateqarnissani qilanaaraa.
- Eimskip Denmark A/S-ip Kalaallit Nunaannut/-nit nassiussanik nalinginnaasunik/nassiussanik tamalaanik tamanik tigusisarneq poortuisarnerlu pillugit Royal Arctic Linemik suleqateqalernissani qilanaarivaa. Suliassaq Atlantikup avannaani usinik isumaginnittarnerup iluani ukiorpassuarni immikkut suliaqarnitsinnik annertusaaneruvoq pissusissamisoortoq, pitsaanerpaamillu Aarhusimi Umiarsualivimmi inissisimaffeqarluni ingerlanneqarpoq sulisunit ukiorpassuarni atorfeqarsimasunit, tamannalu naammattumik eqaatsumillu naammassisaqarsinnaassuseqarnissap qulakkeernissaanut pingaaruteqarluinnarpoq, Jesper Sandahl, Managing Director, Eimskip Denmark A/S, taama oqarpoq.
Nassiussanik tamalaanik isumaginnittarnerup qaqugorpiaq nuunneqarnissaa kiisalu tunniussinissamut piffissaliussat kingusinnerusukkut nalunaarutigineqarumaarput.