RAL-ip sikunissaa aarlerisaarutigaa – Qeqertarsuup Tunua tikikkuminaassasoq
32 gradinik issinnerata Qeqertarsuullu Tunuani sikunerata Royal Arctic Line unammilligassaqartippaa. Assartuullu sapaatip akunnerata tulliani tassunga tikissinnaanera qularnarpoq, umiarsuaatileqatigiiffik nalunaaruteqarpoq.
Avannaani ukiorluinnarpoq. 32 gradinik issimmat imaq sikujartulerpoq, Avannaanilu pajuttaatit aqqutaat annikinnerulerput.
Pajuttaatillu tikinnissaannut pilersaarutit issinneranit sunnerneqarsinnaasut, umiarsuaatileqatigiiffiup Qeqertarsuup Tunuani innuttaasut piareersaqquai.
- Mary Arcticap angalanissaa sapaatip akunnerata tulliani pisussatut pilersaarutigineqarpoq, sikuuneratalu unammilligassaqartitsinissaa naatsorsuutigisinnaassavarput, Qeqertarsuullu tunuanut apuussinnaajunnaarnitsinnik aamma kinguneqarsinnaalluni, Royal Arctic Line Facebookimi allappoq.
Nalinginnaasuusoq
RAL-ip siorna ukiuunerani sikup issuallaarnera pissutigalugu Qeqertarsuup Tunua arlaleriarluni tikinngitsoorpaa.
Innuttaasut sumiiffimmi pilersorneqannginnertik naammaginngikkaat, ukiuunerani sikoqarnera taamaatitsinernut pissutaasinnaasarnera nalinginnaasuusoq, RAL-ip Sermitsiaq.AG-mi apersorneqarnermini nassuiarnikuuaa, najukkanilu suliffeqarfiit ukiunnginnerani siumut kalerrinneqartartut.
Mary Arcticap angalanera kiisalu angalanissat tullinnguuttut arfinillit aappaluttumik nalunaaqutsigaapput, taamaattumillu sikuunera silallu qanoq innera apeqqutaatillugit aatsaat ingerlanneqarsinnaassallutik.
Mary Arctica ippassaq pingasunngornermi Aasiannut tikippoq, maannalu kujammut ingerlavoq. Umiarsuaatileqatigiiffiup nittartagaa naapertorlugu 28. februar Aasiannut tikeqqissaaq.